[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 2.4.5 # Taittiriyabrahmana 2.4.5 Taittirīyabrāhmaṇa 2.4.5 - **Language:** Sanskrit ### [2.4.5.1](https://indike.org/pramana/in.veda.brahmana.taittiriya.2.4.5.1) vṛ́ṣā só am̐śúḥ pavate havíṣmānt sómaḥ / índrasya bhāgá ṛtayúḥ śata\_ā́yuḥ / sá mā vṛ́ṣāṇaṃ vṛṣabháṃ kṛṇotu / priyáṃ viśā́m̐ sárvavīram̐ suvī́ram // kásya vṛ́ṣā saté sácā / niyútvān vṛṣabhó raṇat / vṛtrahā́ sómapītaye // yás te śṛṅga vṛṣo napāt / práṇapāt kuṇḍapā́yyaḥ / ny àsmin dadhra ā́ manaḥ // ### [2.4.5.2](https://indike.org/pramana/in.veda.brahmana.taittiriya.2.4.5.2) tám̐ sadhrī́cīr ūtáyo vṛ́ṣṇiyāni / páum̐syāni niyútaḥ saścur índram / samudráṃ ná síndhava uktháśuṣmāḥ / uruvyácasaṃ gíra ā́viśanti // índrāya gíro ániśitasargāḥ / apáḥ práirayant ságarasya budhnā́t / yó ákṣeṇa\_iva cakríyā śácibhiḥ / víṣvaktastámbha pṛthivī́m utá dyā́m // ákṣodayat\_śávasā kṣā́ma budhnám / vā́rṇávātas táviṣībhir índraḥ // ### [2.4.5.3](https://indike.org/pramana/in.veda.brahmana.taittiriya.2.4.5.3) dṛḍhā́ny aughnād uśámāna ójaḥ / ávābhinat kakúbhaḥ párvatānām // ā́ no agne suketúnā / rayíṃ viśvā́yupoṣasam / mārḍīkáṃ dhehi jīváse // tvám̐ soma mahé bhágam / tváṃ yū́na ṛtāyaté / dákṣaṃ dadhāsi jīváse // ráthaṃ yuñjate marútaḥ śubhé sugám sū́ro ná mitrāvaruṇā gáviṣṭiṣu // ### [2.4.5.4](https://indike.org/pramana/in.veda.brahmana.taittiriya.2.4.5.4) rájām̐si citrā́ vícaranti tanyávaḥ / diváḥ samrājā páyasā na ukṣatam // vā́cam̐ sú mitrāvaruṇāv írāvatīm / parjányaś citrā́ṃ vadati tvíṣīmatīm / abhrā́ vasata marutaḥ su māyáyā / dyā́ṃ varṣayatam aruṇā́m arepásam // áyukta saptá śundhyúvaḥ / sū́ro ráthasya naptríyaḥ / tā́bhir yāti sváyuktibhiḥ // váhiṣṭhebhir viháran yā́si tántum // ### [2.4.5.5](https://indike.org/pramana/in.veda.brahmana.taittiriya.2.4.5.5) avavyáyann ásitaṃ deva vásvaḥ / dávidhvato raśmáyaḥ sū́ryasya / cárma\_iva\_ávādhus támo apsv àntaḥ // parjányāya prágāyata / divás putrā́ya mīḍhúṣe / sá no yavásam icchatu // ácchā vada tavásaṃ gīrbhír ābhíḥ / stuhí parjányaṃ námasā́ vivāsa / kánikradad vṛṣabhó jīrádānuḥ / réto dadhātv óṣadhīṣu gárbham // ### [2.4.5.6](https://indike.org/pramana/in.veda.brahmana.taittiriya.2.4.5.6) yó gárbham óṣadhīnām / gávāṃ kṛṇóty árvatām / parjányaḥ puruṣī́ṇām // tásmā ídāsyè havíḥ / juhótā mádhumattamam / íḍāṃ naḥ saṃyátaṃ karat // tisró yád agne śarádas tvā́m ít / śúciṃ ghṛténa śúcayaḥ saparyán / nā́māni cid dadhire yajñíyāni / ásūdayanta tanúvaḥ sújātāḥ // ### [2.4.5.7](https://indike.org/pramana/in.veda.brahmana.taittiriya.2.4.5.7) índraś ca naḥ śunāsīrau / imáṃ yajñáṃ mimikṣatam / gárbhaṃ dhattám̐ svastáye // yáyor idáṃ víśvaṃ bhúvanam āvivéśa / yáyor ānandó níhito máhaś ca / śúnāsīrāv ṛtúbhiḥ saṃvidānáu / índravantau havír idáṃ juṣethām // ā́ ghā yé agním indhaté / stṛṇánti barhír ānuṣak / yéṣām índro yúvā sákhā // ágne índraś ca medínā / hathó vṛtrā́ṇy apratí / yuvám̐ hí vṛtrahántamā // yā́bhyām̐ súvar ájayann ágra evá / yā́v ātasthatúr bhúvanasya mádhye / prácarṣaṇī́ vṛṣaṇā vájrabāhū / agnī́ índrā vṛtraháṇā huve vām // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.61.6.53) — Sāyaṇa, Sanskrit ## Linked texts (4) - [Śākala](https://indike.org/pramana/in.veda.samhita.rg*sakala.5.63.5) — Sanskrit - [Taittirīyāraṇyaka (complete text)](https://indike.org/pramana/in.veda.aranyaka.taittiriya*complete.1.27.p2) — Sanskrit - [Kauthuma](https://indike.org/pramana/in.veda.samhita.sama*kauthuma.100) — Sanskrit - [Prayogaratna (Bhaṭṭa Nārāyaṇa)](https://indike.org/pramana/in.niti.dharma.prayoga.bhatta.prayogaratna-bhatta-narayana.16.8.2) — Bhaṭṭa Nārāyaṇa, Sanskrit --- Source: [https://indike.org/pramana/in.veda.brahmana.taittiriya.2.4.5](https://indike.org/pramana/in.veda.brahmana.taittiriya.2.4.5) · Pramāṇa