[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 2.4.6 # Taittiriyabrahmana 2.4.6 Taittirīyabrāhmaṇa 2.4.6 - **Language:** Sanskrit ### [2.4.6.1](https://indike.org/pramana/in.veda.brahmana.taittiriya.2.4.6.1) utá naḥ priyā́ priyā́su / saptásvasā sújuṣṭā / sárasvatī stómyā\_abhūt // imā́ júhvānā yuṣmád ā́ námobhiḥ / práti stómam̐ sarasvati juṣasva / táva śárman priyátame dádhānāḥ / úpastheyāma śaraṇáṃ ná vṛkṣám // trī́ṇi padā́ vícakrame / víṣṇur gopā́ ádābhyaḥ / táto dhármāṇi dhāráyan // ### [2.4.6.2](https://indike.org/pramana/in.veda.brahmana.taittiriya.2.4.6.2) tád asya priyám abhí pā́tho aśyām / náro yátra devayávo mádanti / urukramásya sá hí bándhur itthā́ / víṣṇoḥ padé paramé mádhva útsaḥ // kratvā dā́ asthu śréṣṭhaḥ / adyá tvā vanvánt surékṇāḥ / márta ānāśa suvṛktím // imā́ brahma brahmavāha / priyā́ ta ā́ barhíḥ sīda / vīhí sūra puroḍā́śam // ### [2.4.6.3](https://indike.org/pramana/in.veda.brahmana.taittiriya.2.4.6.3) úpa naḥ sūnávo gíraḥ / śṛṇván tvam ṛ́tasya yé / sumṛḍīkā́ bhavantu naḥ // adyā́ no deva savitaḥ / prajā́vat sāvīḥ sáubhagam / párā duṣṣvápniyam̐ suva // víśvāni deva savitaḥ / duritā́ni párāsuva / yád bhadráṃ tán ma ā́suva // śúcim arkáir bṛ́haspátim // ### [2.4.6.4](https://indike.org/pramana/in.veda.brahmana.taittiriya.2.4.6.4) adhvaréṣu namasyata / anāmy ója ā́cake // yā́\_adhāráyanta devā́ sudákṣā dákṣapitārā / asuryā̀ya prámahasā // sá ít kṣéti súdhita ókasi své / tásmā íḍā pinvate viśvadā́nī / tásmai víśaḥ svayám evá\_ānamanti / yásmin brahmā́ rā́jani pū́rva éti // sákūtim indra sácyutim / sácyutiṃ jaghánacyutim // ### [2.4.6.5](https://indike.org/pramana/in.veda.brahmana.taittiriya.2.4.6.5) kanā́t kābhā́ṃ na ā́bhara / prayapsyánn iva sakthyàu // ví na indra mṛ́dho jahi / kánīkhunad iva sāpáyan / abhí naḥ súṣṭutiṃ naya // prajā́patiḥ striyā́ṃ yáśaḥ / muṣkáyor adadhāt sápam / kā́masya tṛ́ptim ānandám / tásya\_agne bhājaya\_ihá mā // módaḥ pramodá ānandáḥ // ### [2.4.6.6](https://indike.org/pramana/in.veda.brahmana.taittiriya.2.4.6.6) muṣkáyor níhitaḥ sápaḥ / sṛtvā́\_iva kā́masya tṛpyāṇi / dákṣiṇānāṃ pratigrahé // mánasaś cit tám ā́kūtim / vācáḥ satyám aśīmahi / paśūnā́m̐ rūpám ánnasya / yáśaḥ śrī́ḥ śrayatāṃ máyi // yáthā\_ahám asyā́ átṛpam̐ striyái púmān / yáthā strī́ tṛ́pyati pum̐sí priyé priyā́ / eváṃ bhágasya tṛ́pyāṇi // ### [2.4.6.7](https://indike.org/pramana/in.veda.brahmana.taittiriya.2.4.6.7) yajñásya kā́myaḥ priyáḥ // dádāmi\_íty agnír vadati / táthā\_íti vāyúr āha tát / hánta\_íti satyáṃ candrámāḥ / ādityáḥ satyám óm íti // ā́pas tát satyám ā́bharan / yáśo yajñásya dákṣiṇām / asáu me kā́maḥ sámṛdhyatām // ná hí spáśam ávidann anyám asmā́t / vaiśvānarā́t puraetā́ram agnéḥ // ### [2.4.6.8](https://indike.org/pramana/in.veda.brahmana.taittiriya.2.4.6.8) átha\_im amanthann amṛ́tam ámūrāḥ / vaiśvānaráṃ kṣetrajítyāya devā́ḥ // yéṣām imé pū́rve ármāsa ā́san / ayūpā́ḥ sádma víbhṛtā purū́ṇi / váiśvānara tváyā té nuttā́ḥ / pṛthivī́m anyā́m abhítasthur jánāsaḥ // pṛthivī́ṃ mātáraṃ mahī́m / antárikṣam úpabruve / bṛhatī́m ūtáye dívam // víśvaṃ bibharti pṛthivī́ // ### [2.4.6.9](https://indike.org/pramana/in.veda.brahmana.taittiriya.2.4.6.9) antárikṣaṃ vípaprathe / duhé dyáur bṛhatī́ páyaḥ // ná tā́ naśanti ná dabhāti táskaraḥ / ná\_enā amitró vyáthir ā́dadharṣati / devā́m̐ś ca yā́bhir yájate dádāti ca / jyóg it tā́bhiḥ sacate gópatiḥ sahá // ná tā́ árvā reṇúkakāṭo aśnute / ná sam̐skṛtatrám úpayanti tā́ abhí / urugāyám ábhayaṃ tásya tā́ ánu / gā́vo mártyasya vícaranti yájvanaḥ // ### [2.4.6.10](https://indike.org/pramana/in.veda.brahmana.taittiriya.2.4.6.10) rā́trī vyàkhyad āyatī́ / purutrā́ devy àkṣábhiḥ / víśvā ádhi śríyo 'dhita // úpa te gā́ iva\_ákaram / vṛṇīṣvá duhitar divaḥ / rā́trī stómaṃ ná jigyúṣī // devī́ṃ vā́cam ajanayanta devā́ḥ / tā́ṃ viśvárūpāḥ paśávo vadanti / sā́ no mandréṣam ū́rjaṃ dúhānā dhenúr vā́g asmā́n úpa súṣṭutā\_étu // ### [2.4.6.11](https://indike.org/pramana/in.veda.brahmana.taittiriya.2.4.6.11) yád vā́g vádanty avicetanā́ni / rā́ṣṭrī devā́nāṃ niṣasā́da mandrā́ / cátasra ū́rjaṃ duduhe páyām̐si / kvà svid asyāḥ paramáṃ jagāma // gaurī́ mimāya salilā́ni tákṣatī / ékapadī dvipádī sā́ cátuṣpadī / aṣṭā́padī návapadī babhūvúṣī / sahásra\_akṣarā paramé vyòman // tásyām̐ samudrā́ ádhi víkṣaranti / téna jīvanti pradíśaś cátasraḥ // ### [2.4.6.12](https://indike.org/pramana/in.veda.brahmana.taittiriya.2.4.6.12) tátaḥ kṣaraty akṣáram / tád víśvam úpajīvati // índrā sū́rā janáyan viśvákarmā / marútvām̐ astu gaṇávānt sajātávān / asyá snuṣā́ śváśurasya práśiṣṭim / sapátnā vā́caṃ mánasā úpāsatām // índraḥ sū́ro atarad rájām̐si / snuṣā́ sapátnaḥ śváśuro 'yám astu / ayám̐ śátrūñ jayatu járhṛṣāṇaḥ / ayáṃ vā́jaṃ jayatu vā́jasātau // agníḥ kṣatrabhṛ́d ánibhṛṣṭam ójaḥ / sahasríyo dīpyatām áprayucchan / vibhrā́jamānaḥ samidhāná ugráḥ / ā́\_antárikṣam aruhad ágan dyā́m // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.61.11.1) — Sāyaṇa, Sanskrit ## Linked texts (2) - [Āgniveśyagṛhyasūtra](https://indike.org/pramana/in.vedanga.kalpa.grhya.agnivesya.1.5.1.10) — Agniveśa, Sanskrit - [Kauthuma](https://indike.org/pramana/in.veda.samhita.sama*kauthuma.317) — Sanskrit --- Source: [https://indike.org/pramana/in.veda.brahmana.taittiriya.2.4.6](https://indike.org/pramana/in.veda.brahmana.taittiriya.2.4.6) · Pramāṇa