Taittiriyabrahmana 2.4.8
Taittirīyabrāhmaṇa 2.4.8
- Language
- Sanskrit
2.4.8.1
sá pratnaván návīyasā /
ágne dyumnéna saṃyátā /
bṛhát tanantha bhānúnā /
návaṃ nú stómam agnáye /
diváḥ śyenā́ya jījanam /
vásoḥ kuvíd vanā́ti naḥ /
svāruhā́ yásya śríyo dṛśé /
rayír vīrávato yathā /
ágre yajñásya cétataḥ //
ádābhyaḥ puraetā́ //
2.4.8.2
agnír viśā́ṃ mā́nuṣīṇām /
tū́rṇī ráthaḥ sádā návaḥ //
návam̐ sómāya vājíne /
ā́jyaṃ páyaso 'jani /
júṣṭam̐ śúcitamaṃ vásu //
návam̐ soma juṣasva naḥ /
pīyū́ṣasya_ihá tṛpṇuhi /
yás te bhāgá ṛtā́ vayám //
návasya soma te vayám /
ā́ sumatíṃ vṛṇīmahe //
2.4.8.3
sá no rāsva sahasríṇaḥ //
návam̐ havír juṣasva naḥ /
ṛtúbhiḥ soma bhū́tamam /
tád aṅga prátiharya naḥ /
rā́jant soma svastáye //
návam̐ stómaṃ návam̐ havíḥ /
indrāgníbhyāṃ nívedaya /
táj juṣetām̐ sácetasā //
śúciṃ nú stómaṃ návajātam adyá /
índrāgnī vṛtrahaṇā juṣéthām //
2.4.8.4
ubhā́ hí vām̐ suhávā jóhavīmi /
tā́ vā́jam̐ sadyá uśaté dhéṣṭhā //
agnír índro návasya naḥ /
asya havyásya tṛpyatām /
ihá deváu sahasríṇau //
yajñáṃ na ā́ hí gácchatām /
vásumantam̐ suvarvídam /
asyá havyásya tṛpyatām /
agnír índro návasya naḥ /
víśvān devā́m̐s tarpayata //
2.4.8.5
havíṣo 'syá návasya naḥ /
suvarvído hí jajñiré //
ā́ _idáṃ barhíḥ suṣṭárīmā návena /
ayáṃ yajñó yájamānasya bhāgáḥ /
ayáṃ babhūva bhúvanasya gárbhaḥ /
víśve devā́ idám adyá_āgamiṣṭhāḥ //
imé nú dyā́vāpṛthivī́ samī́cī /
tanvāné yajñáṃ purupéśasaṃ dhiyā́ /
ā́ _asmai pṛṇītāṃ bhúvanāni víśvā /
prajā́ṃ púṣṭim amṛ́taṃ návena //
2.4.8.6
imé dhenū́ amṛ́taṃ yé duhā́te /
páyasvaty uttarā́m etu púṣṭiḥ /
imáṃ yajñáṃ juṣámāṇe návena /
samī́cī dyā́vāpṛthivī́ ghṛtā́cī //
yáviṣṭho havyavā́hanaḥ /
citrábhānur ghṛtā́sutiḥ /
návajāto vírocase /
ágne tát te mahitvanám //
tvám agne devátābhyaḥ /
bhāgé deva ná mīyase //
2.4.8.7
sá enā vidvā́n yakṣyasi /
návam̐ stómaṃ juṣasva naḥ //
agníḥ prathamáḥ prā́śnātu /
sá hí véda yáthā havíḥ /
śivā́ asmábhyam óṣadhīḥ /
kṛṇótu viśvácarṣaṇiḥ //
bhadrā́n naḥ śréḥ sámanaiṣṭa devāḥ /
tváyā vaséna sámaśīmahi tvā /
sá no mayobhū́ḥ pito ā́viśasva /
śáṃ tokā́ya tanúve syonáḥ //
etám ú tyáṃ mádhunā sáṃyutaṃ yávam /
sárasvatyā ádhimanā́va carkruṣuḥ /
índra āsīt sī́rapatiḥ śatákratuḥ /
kīnā́śā āsan marútaḥ sudā́navaḥ //
Commentaries (1)
- Taittirīyabrāhmaṇabhāṣya (Sāyaṇa) — Sāyaṇa, Sanskrit