Taittiriyabrahmana 2.5.1
Taittirīyabrāhmaṇa 2.5.1
- Language
- Sanskrit
2.5.1.1
prāṇó rakṣati víśvam éjat /
íryo bhūtvā́ bahudhā́ bahū́ni /
sá ít sárvaṃ vyā̀naśe //
yó devó devéṣu vibhū́r antáḥ /
ā́vṛd ūdā́t kṣetríyadhvagád vṛ́ṣā /
tám ít prāṇáṃ mánasā_úpaśikṣata /
ágraṃ devā́nām idám attu no havíḥ //
mánasaś cíttā_idám /
bhūtáṃ bhávyaṃ ca gupyate /
tád dhí devéṣv agriyám //
2.5.1.2
ā́ na etu puraścarám /
sahá deváir imám̐ hávam /
mánaḥ śréyasi_śreyasi /
kárman yajñápatiṃ dádhat //
juṣátāṃ me vā́g idám̐ havíḥ /
virā́ḍ devī́ puróhitā /
havyavā́ḍ ánapāyinī //
yáyā rūpā́ṇi bahudhā́ vádanti /
péśām̐si devā́ḥ paramé janítre /
sā́ no virā́ḍ ánapasphurantī //
2.5.1.3
vā́g devī́ juṣatām idám̐ havíḥ //
cákṣur devā́nāṃ jyótir amṛ́te nyàktam /
asyá vijñā́nāya bahudhā́ nídhīyate /
tásya sumnám aśīmahi /
mā́ no hāsīd vicakṣaṇám //
ā́yur ít _naḥ prátīryatām /
ánandhāś cákṣuṣā vayám /
jīvā́ jyótir aśīmahi /
súvar jyótir utá_amṛ́tam //
śrotreṇa bhadrám utá śṛṇvanti satyám /
śrótreṇa vā́caṃ bahudhā́_udyámānām /
śrótreṇa módaś ca máhaś ca śrūyate /
śrótreṇa sárvā diśá ā́śṛṇomi //
yéna prā́cyā utá dakṣiṇā /
pratī́cyai diśáḥ śṛṇvánty uttarā́t /
tád ít _śrótraṃ bahudhā́ udyámānam /
arā́n ná nemíḥ pári sárvaṃ babhūva //
Commentaries (1)
- Taittirīyabrāhmaṇabhāṣya (Sāyaṇa) — Sāyaṇa, Sanskrit