Taittiriyabrahmana 2.5.2
Taittirīyabrāhmaṇa 2.5.2
- Language
- Sanskrit
2.5.2.1
udéhi vājinyó asy apsv àntaḥ /
idám̐ rāṣṭrám ā́viśa sūnṛ́tāvat /
yó róhito víśvam idáṃ jajā́na /
sá no rāṣṭréṣu súdhitān dadhātu /
róham̐_roham̐ róhita ā́ruroha /
prajā́bhir vṛ́ddhiṃ janúṣām upástham /
tā́bhíḥ sám̐rabdho avidat ṣáḍ urvī́ḥ /
gātúṃ prapáśyann ihá rāṣṭrám ā́hāḥ //
ā́hārṣīd rāṣṭrám ihá róhitaḥ /
mṛ́dho vyā̀sthad ábhayaṃ no astu //
2.5.2.2
asmábhyaṃ dyāvāpṛthivī śakvarībhiḥ /
rāṣṭráṃ duhāthām ihá revátībhiḥ /
vímamarśa róhito viśvárūpaḥ /
samācakāṇáḥ prarúho rúhaś ca /
dívaṃ gatvā́ya mahatā́ mahimnā́ /
ví no rāṣṭrám unattu páyasā svéna /
yā́s te víśas tápasā saṃbabhūvúḥ /
gāyatráṃ vatsám ánu tā́s ta ā́guḥ /
tā́s tvā́ viśantu máhasā svéna /
sáṃ mātā putró abhyètu róhitaḥ //
2.5.2.3
yūyám ugrā marutaḥ pṛśnimātaraḥ /
índreṇa sayújā prámṛṇītha śátrūn /
ā́ vo róhito aśṛṇod abhidyavaḥ /
trísaptāso marutaḥ svādusaṃmudaḥ //
róhito dyā́vāpṛthivī́ jajāna /
tásmim̐s tántuṃ parameṣṭhī́ tatāna /
tásmin_śiśriye ajá ékapāt /
ádṛm̐had dyā́vāpṛthivī́ bálena //
róhito dyā́vāpṛthivī́ adṛm̐hat /
téna súvaḥ stabhitáṃ téna nā́kaḥ //
2.5.2.4
só antárikṣe rájaso vimā́naḥ /
téna devā́ḥ súvar ánvavindan //
suśévaṃ tvā bhānávo dīdivā́m̐sam /
sámagrāso juhvò jātavedaḥ /
ukṣánti tvā vājínam ā́ ghṛténa /
sám̐sam agne yuvase bhójanāni //
ágne śárdha mahaté sáubhagāya /
táva dyumnā́ny uttamā́ni santu /
sáṃ jāspatyám̐ suyámam ā́kṛṇuṣva /
śatrūyatā́m abhítiṣṭhā máhām̐si //
Commentaries (1)
- Taittirīyabrāhmaṇabhāṣya (Sāyaṇa) — Sāyaṇa, Sanskrit