Taittiriyabrahmana 2.5.3
Taittirīyabrāhmaṇa 2.5.3
- Language
- Sanskrit
2.5.3.1
púnar na índro maghávā dadātu /
dhánāni śakró ghányaḥ surā́dhāḥ /
arvācī́nam kṛṇutāṃ yācitó mánaḥ /
śruṣṭī́ no asyá havíṣo juṣāṇáḥ //
yā́ni no jinán dhánāni /
jahártha śūra manyúnā /
índra_anuvinda nas tā́ni /
anéna havíṣā púnaḥ //
índra ā́śābhyaḥ pári /
sárvābhyó 'bhayaṃ karat //
2.5.3.2
jétā śátrūn vícarṣaṇiḥ //
ā́kūtyai tvā kā́māya tvā samṛ́dhe tvā /
puró dadhe amṛtatvā́ya jīváse //
ā́kūtim asya_ávase /
kā́mam asya sámṛddhyai /
índrasya yuñjate dhíyaḥ //
ā́kūtiṃ devī́ṃ mánasaḥ puró dadhe /
yajñásya mātā́ suhávā me astu /
yád icchā́mi mánasā sákāmaḥ /
vidéyam enad dhṛ́daye níviṣṭam //
2.5.3.3
sa_íd agnír agnī́m̐r átyety anyā́n /
yátra vājī́ tánayo vīḍúpāṇiḥ /
sahásrapāthā akṣárā saméti //
ā́śānāṃ tvā_āśāpālébhyaḥ /
catúrbhyo amṛ́tebhyaḥ /
idáṃ bhūtásya_ádhyakṣebhyaḥ /
vidhéma havíṣā vayám //
víśvā ā́śā mádhunā sám̐sṛjāmi /
anamīvā́ ā́pa óṣadhayo bhavantu /
ayáṃ yájamāno mṛ́dho vyàsyatām //
2.5.3.4
ágṛbhītā́ḥ paśávaḥ santu sárve //
agníḥ sómo váruṇo mitrá índraḥ /
bṛ́haspátiḥ savitā́ yáḥ sahasrī́ /
pūṣā́ no góbhir ávasā sárasvatī /
tváṣṭā rūpā́ṇi sámanaktu yajñáiḥ //
tváṣṭā rūpā́ṇi dádhatī sárasvatī /
pūṣā́ bhágam̐ savitā́ no dadātu /
bṛ́haspátir dádad índraḥ sahásram /
mitró dātā́ váruṇaḥ sómo agníḥ //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (5)
- Āśvalāyanaśrautasūtra — Āśvalāyana, Sanskrit
- Mādhyandina — Sanskrit
- A Vedic Concordance — Maurice Bloomfield, English
- Yajurbrāhmaṇa — Sanskrit
- Die Kosmographie der Inder nach den Quellen dargestellt — Willibald Kirfel, German