Taittiriyabrahmana 2.5.4
Taittirīyabrāhmaṇa 2.5.4
- Language
- Sanskrit
2.5.4.1
ā́ no bhara bhágam indra dyumántam /
ní te deṣṇásya dhīmahi prareké /
urvá iva paprathe kā́mo asmé /
tám ā́pṛṇā vasupate vásūnām //
imáṃ kā́maṃ mandayā góbhir áśvaiḥ /
candrávatā rā́dhasā papráthaś ca /
suvaryávo matíbhis túbhyaṃ víprāḥ /
índrāya vā́haḥ kuśikā́so akran //
índrasya nú vīryā̀ṇi právocam /
yā́ni cakā́ra prathamā́ni vajrī́ //
2.5.4.2
áhann áhim ánv apás tatarda /
prá vakṣáṇā abhinat párvatānām //
áhann áhiṃ párvate śiśriyāṇám /
tváṣṭā_asmai vájram̐ svaryàṃ tatakṣa /
vāśrā́ iva dhenávaḥ syándamānāḥ /
áñjaḥ samudrám ávajagmur ā́paḥ /
vṛṣāyámāṇo 'vṛṇīta sómam /
tríkadrukeṣv apibat sutásya /
ā́ sā́yakaṃ maghávā_ādatta vájram /
áhann enaṃ prathamajā́m áhīnām //
2.5.4.3
yád índra_áhan prathamajā́m áhīnām /
ā́t _māyínām ámināḥ prota māyā́ḥ /
ā́t sū́ryaṃ janáyan dyā́m uṣā́sam /
tādī́knā śátrūn ná kíla_āvivitse //
áhan vṛtráṃ vṛtratáraṃ vyám̐sam /
índro vájreṇa mahatā́ vadhéna /
skándhām̐si_iva kúliśenā vívṛkṇā /
áhiḥ śayata upapṛ́k pṛthivyā́m /
ayodhy évá durmáda ā́ hí juhvé /
mahāvīráṃ tu vibādhám ṛjīṣám //
2.5.4.4
ná_ātārīr asya sámṛtíṃ vadhā́nām /
sám̐ rujā́nāḥ /
pipiṣa índraśatruḥ //
víśvo víhāyā aratíḥ /
vásur dadhe háste dákṣiṇe /
taráṇir ná śiśrathat /
śravasyàyā ná śiśrathat /
víśvasmā íd iṣudhyasé /
devatrā́ havyám ū́hiṣe /
víśvasmā ít sukṛ́te vā́ram ṛṇvati /
agnír dvā́rā vyṛ̀ṇvati //
2.5.4.5
úd ujjíhāno abhí kā́mam īráyan /
prapṛñcán víśvā bhúvanāni pūrváthā /
ā́ ketúnā súṣamiddho yájiṣṭhaḥ /
kā́maṃ no agne abhíharya digbhyáḥ //
juṣāṇó havyámam ṛ́teṣu dūḍhyàḥ /
ā́ no rayíṃ bahulā́ gómatīm íṣam /
nídhehi yákṣad amṛ́teṣu bhū́ṣan //
áśvinā yajñám ā́gatam /
dāśuṣaḥ púrudam̐sasā /
pūṣā́ rakṣatu no rayím //
2.5.4.6
imáṃ yajñám aśvínā vardháyantā /
imáu rayíṃ yájamānāya dhattam /
imáu paśū́n rakṣatāṃ viśváto naḥ /
pūṣā́ naḥ pātu sádam áprayucchan //
prá te mahé sarasvati /
súbhage vā́jinīvati /
satyavā́ce bhare matím //
idáṃ te havyáṃ ghṛtávat sarasvati /
satyavā́ce prábharemā havī́m̐ṣi /
imā́ni te duritā́ sáubhagāni /
tébhir vayám̐ subháḥ syāma //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (4)
- A Vedic Concordance — Maurice Bloomfield, English
- Yajurbrāhmaṇa — Sanskrit
- Saṃhitāpadapāṭha — Sanskrit
- Ṛgvedamantrabhāṣya — Sanskrit