Pramāṇa · Search · About · API

Taittiriyabrahmana 2.5.6

Taittirīyabrāhmaṇa 2.5.6

Language
Sanskrit

2.5.6.1

vā́rtrahatyāya śávase /
pṛtanāsā́hyāya ca /
índra tvāvartayāmasi //
subráhmāṇaṃ vīrávantaṃ bṛhántam /
urúṃ gabhīráṃ pṛthúbudhnam indra /
śrutárṣim ugrám abhimātiṣā́ham /
asmábhyaṃ citráṃ vṛ́ṣaṇam̐ rayíṃ dāḥ /
kṣetriyái tvā nírṛtyai tvā /
druhó muñcāmi váruṇasya pā́śāt /
anāgásaṃ bráhmaṇe tvā karomi //

2.5.6.2

śivé te dyā́vāpṛthivī́ ubhé imé //
śáṃ te agníḥ sahá_ádbhir astu /
śáṃ te cátasraḥ pradíśo bhavantu //
yā́ dáivīś cátasraḥ pradíśaḥ /
vā́tapatnīr abhí sū́ryo vicaṣṭé /
tā́sāṃ tvā jarása ā́dadhāmi /
prá yákṣma etu nírṛtiṃ parācáiḥ /
ámoci yákṣmād duritā́d ávartyai //

2.5.6.3

druháḥ pā́śān nírṛtyai ca_údamoci /
áhā ávartim ávidat syonám /
ápyabhūd bhadré sukṛtásya loké //
sū́ryam ṛtáṃ támaso grā́hyā yát /
devā́ ámuñcann ásṛjan vyènasaḥ /
evám ahám imáṃ kṣetriyā́j jāmiśam̐sā́t /
druhó muñcāmi váruṇasya pā́śāt //
bṛ́haspate yuvám índraś ca vásvaḥ /
divyásya_iśāthe utá pā́rthivasya /
dhattám̐ rayím̐ stuvaté kīráye cit //

2.5.6.4

yūyáṃ pāta svastíbhiḥ sádā naḥ /
devāyúdham índram ā́jóhuvānāḥ /
viśvāvṛ́dham abhí yé rákṣamāṇāḥ /
yéna hatā́ dīrghám ádhvānam ā́yan /
anantám ártham nivartsyamānāḥ //
yát te sujāte himávatsu bheṣajám /
mayobhū́ḥ śáṃtamā yád dhṛdó 'si /
táto no dehi sībale //
adó giríbhyo ádhi yát pradhā́vasi /
sam̐śóbhamānā kanyā_ìva śubhre //

2.5.6.5

tā́ṃ tvā múdgalā havíṣā vardhayanti /
sā́ naḥ sībale rayím ā́bhājaya_ihá /
pū́rvaṃ devā ápareṇa_anupáśyañ jánmabhiḥ /
jánma_anyávaraiḥ párāṇi /
védāni devā ayám asmi_íti mā́m /
ahám̐ hitvā́ śárīraṃ jarásaḥ parástāt //
prāṇāpānáu cákṣuḥ śrótram /
vā́caṃ mánasi sáṃbhṛtām /
hitvā́ śárīraṃ jarásaḥ parástāt /
ā́ bhū́tiṃ bhū́tiṃ vayám aśnavāmahai //
imā́ evá tā́ uṣáso yā́ḥ prathamā́ vyáucchan /
tā́ devyàḥ kurvate páñca rūpā́ /
śáśvatīr ná_avapṛjyanti /
ná gamanty ántam //

Commentaries (4)

Linked texts (6)