Taittiriyabrahmana 2.5.7
Taittirīyabrāhmaṇa 2.5.7
- Language
- Sanskrit
2.5.7.1
vásūnāṃ tvā_ádhītena /
rudrā́ṇām ūrmyā́ /
ādityā́nāṃ téjasā /
víśveṣāṃ devā́nāṃ krátunā /
marútām émnā juhomi svā́hā //
abhíbhūtir ahám ā́gamam /
índrasakhā svāyúdhaḥ /
ā́ssva_ā́śāsu duṣṣáhaḥ //
idáṃ várco agnínā dattám ā́gāt /
yáśo bhárgaḥ sáha ójo bálaṃ ca //
2.5.7.2
dīrghāyutvā́ya śatáśāradāya /
prátigṛbhṇāmi mahaté vīryā̀ya //
ā́yur asi viśvā́yur asi /
sarvā́yur asi sárvam ā́yur asi /
sárvaṃ ma ā́yur bhūyāt /
sárvam ā́yur geṣam //
bhū́r bhuvaḥ súvaḥ /
agnír dhármeṇa_annādáḥ /
mṛtyúr dhármeṇa_ánnapatiḥ /
bráhma kṣatrám̐ svā́hā //
2.5.7.3
prajā́patiḥ praṇetā́ /
bṛ́haspátiḥ puraetā́ /
yamáḥ pánthāḥ /
candrámāḥ punarasúḥ svā́hā /
agnír annādó 'nnapatiḥ /
annā́dyam asmín yajñé yájamānāya dadātu svā́hā //
sómo rā́jā rā́japatiḥ /
rājyám asmín yajñé yájamānāya dadātu svā́hā //
váruṇaḥ samrā́ṭ samrā́ṭpatiḥ /
sā́mrājyam asmín yajñé yájamānāya dadātu svā́hā //
2.5.7.4
mitráḥ kṣatráṃ kṣatrápatiḥ /
kṣatrám asmín yajñé yájamānāya dadātu svā́hā //
índro bálaṃ bálapatiḥ /
bálam asmín yajñé yájamānāya dadātu svā́hā //
bṛ́haspátir bráhma bráhmapatiḥ /
bráhma_asmín yajñé yájamānāya dadātu svā́hā //
savitā́ rāṣṭrám̐ rāṣṭrápatiḥ /
rāṣṭrám asmín yajñé yájamānāya dadātu svā́hā //
pūṣā́ viśā́ṃ víṭpatiḥ víśam asmín yajñé yájamānāya dadātu svā́hā //
sárasvatī púṣṭiḥ púṣṭipatnī /
púṣṭim asmín yajñé yájamānāya dadātu svā́hā //
tváṣṭā paśūnā́ṃ mithunā́nām̐ rūpakṛ́d rupápatiḥ /
rūpéṇa_asmín yajñé yájamānāya paśū́n dadātu svā́hā //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (5)
- Mādhyandina — Sanskrit
- A Vedic Concordance — Maurice Bloomfield, English
- Yajurbrāhmaṇa — Sanskrit
- Altindische Grammatik — Jacob Wackernagel & Albert Debrunner, German
- The Religion and Philosophy of the Veda and Upanishads — Arthur Berriedale Keith, English