Pramāṇa · Search · About · API

Taittiriyabrahmana 2.5.8

Taittirīyabrāhmaṇa 2.5.8

Language
Sanskrit

2.5.8.1

sá īṃ pāhi yá ṛjīṣī́ tárutraḥ /
yáśśípravān vṛṣabhó yó matīnā́m /
yó gotrabhíd vajrabhṛ́d yó hariṣṭhā́ḥ /
sá indra citrā́m̐ abhítṛndhi vā́jān //
ā́ te śúṣmo vṛṣabhá etu paścā́t /
ā́_uttarā́d adharā́gā́ purástāt /
ā́ viśváto abhí sámetv arvā́ṅ /
índra dyumnám̐ súvarvad dhehy asmé //
próṣv asmai purorathám /
índrāya śūṣám arcata //

2.5.8.2

abhī́ke cid u lokakṛ́t /
saṅgé samátsu vṛtrahā́ /
asmā́kaṃ bodhi coditā́ /
nábhantām anyakéṣām /
jyākā́ ádhi dhánvasu //
índraṃ vayám̐ śunāsī́ram /
asmín yajñé havāmahe /
ā́ vā́jair úpa no gamat //
índrāya śúnāsī́rāya /
srucā́ juhuta no havíḥ //

2.5.8.3

juṣátāṃ práti médhiraḥ //
prá havyā́ni ghṛtávanty asmai /
háryaśvāya bhartā sajóṣāḥ /
índra_ṛtúbhir bráhmaṇā vāvṛdhānáḥ /
śunāsīrī́ havír idáṃ juṣasva //
váyaḥ suparṇā́ úpasedur índram /
priyámedhā ṛ́ṣayo nā́dhamānāḥ /
ápa dhvāntám ūrṇuhí pūrdhí cákṣuḥ /
mumugdhy àsmān nidháya_iva baddhā́n //
bṛhád índrāya gāyata //

2.5.8.4

máruto vṛtrahántamam /
yéna jyótir ájanayann ṛtāvṛ́dhaḥ /
deváṃ devā́ya jā́gṛvi //
kā́ miháikāḥ ká imé pataṅgā́ḥ /
mānthālā́ḥ kúli pári mā patanti /
ánāvṛtā_enān prádhamantu devā́ḥ /
sáuparṇaṃ cákṣus tanúvā videya //
evá_āvandasva váruṇaṃ bṛhántam /
namasyā́ dhī́ram amṛ́tasya gopā́m /
sá naḥ śárma trivárūthaṃ víyam̐sat //

2.5.8.5

yūyáṃ pāta svastíbhiḥ sádā naḥ //
nā́ke suparṇám úpa yát pátantam /
hṛdā́ vénanto abhyácakṣata tvā /
híraṇyapakṣaṃ váruṇasya dūtám /
yamásya yónau śakunáṃ bhuraṇyúm //
śáṃ no devī́r abhíṣṭaye /
ā́po bhavantu pītáye /
śáṃ yór abhísravantu naḥ //
ī́śānā vā́ryāṇām /
kṣáyantīś carṣaṇīnā́m //

2.5.8.6

apó yācāmi bheṣajám //
apsú me sómo abravīt /
antár víśvāni bheṣajā́ /
agníṃ ca viśváśaṃbhuvam /
ā́paś ca viśvábheṣajīḥ //
yád apsú te sarasvati /
góṣv áśveṣu yán mádhu /
téna me vājinīvati /
múkham sarasvati //
yā́ sárasvatī vaiśambhalyā́ //

2.5.8.7

tásyāṃ me rāsva /
tásyās te bhakṣīya /
tásyās te bhūyiṣṭhabhā́jo bhūyāsma //
aháṃ tvád asmi mád asi tvám etát /
máma_asi yónis táva yónir asmi /
máma_ivá sán vaha havyā́ny agne /
putráḥ pitré lokakṛ́t_ jātavedaḥ //
ihá_evá sán tatra sántaṃ tvā_agne /
prāṇéna vācā́ mánasā bibharmi /
tiró mā sántam ā́yur mā́ práhāsīt //

2.5.8.8

jyótiṣā tvā vaiśvānaréṇa_úpatiṣṭhe //
ayáṃ te yónir ṛtvíyaḥ /
yáto jātó árocathāḥ /
táṃ jānánn agna ā́roha /
áthā no vardhayā rayím //
yā́ te agne yajñíyā tanū́s táyā_íhy ā́roha_ātmā́nam /
ácchā kṛṇvánn asmé náryā purū́ṇi /
yajñó bhūtvā́ yajñám ā́sīda svā́ṃ yónim /
jā́tavedo bhúva ā́jā́yamānaḥ sákṣaya éhi //
upā́varoha jātavedaḥ púnas tvám //

2.5.8.9

devébhyo havyáṃ vaha naḥ prajānán /
ā́yuḥ prajā́m̐ rayím asmā́su dhehi /
ájasro dīdihi no duroṇé //
tám índraṃ johavīmi /
maghávānam ugrám /
satrā́dádhānam ápratiṣkutam̐ śávām̐si /
mám̐hiṣṭho gīrbhír ā́ ca yajñíyo 'vavártat /
rāyé no víśvā supáthā kṛṇotu vajrī́ /
tríkadrukeṣu mahiṣó yávāśiraṃ tuviśúṣmas tṛpát /
sómam apibad víṣṇunā sutáṃ yáthā_ávaśat /
sá īṃ mamāda máhi kárma kártave mahā́m urúm //

2.5.8.10

sáinam̐ saścad deváṃ deváḥ satyám índum̐ satyá índraḥ //
vidád yátī sarámā rugṇam ádreḥ /
máhi pā́thaḥ pūrvyám̐ sadhríyakkaḥ /
ágraṃ nayat supády ákṣarāṇām /
ácchā rávaṃ prathamā́ jānatī́ gāt //
vidád gávyam̐ sarámā dṛḍhám ūrvám /
yénā núkaṃ mā́nusī bhójate víṭ /
ā́ yé víśvā svapatyā́ni cakrúḥ /
kṛṇvānā́so amṛtatvā́ya gātúm //
tváṃ nṛ́bhir nṛpate deváhūtau //

2.5.8.11

bhū́rīṇi vṛtvā́ haryaśva ham̐si /
tváṃ nídasyuṃ cúmurim /
dhúniṃ ca_ásvāpayo dabhī́taye suhántu //
evā́ pāhi pratnáthā mándatu tvā /
śrudhí bráhma vāvṛdhasva_utá gīrbhíḥ /
āvíḥ sū́ryaṃ kṛṇuhí pīpíhīṣáḥ /
jahí śátrūm̐r abhí gā́ indra tṛndhi //
ágne bā́dhasva ví mṛ́dho nudasva /
ápa_amīvā ápa rákṣām̐si sedha /
asmā́t samudrā́d bṛható divó naḥ //

2.5.8.12

apā́ṃ bhūmā́nam úpa naḥ sṛja_ihá /
yájña prátitiṣṭha sumatáu ā́ tvā /
vásūni purudhā́ viśantu /
dīrghám ā́yur yájamānāya kṛṇván /
jaritā́ram //
índraḥ śunā́vad vítanoti sī́ram /
saṃvatsarásya pratimā́ṇam etát /
arkásya jyótis tád íd āsa jyéṣṭham /
saṃvatsarám̐ śunávat sī́ram etát //
índrasya rā́dhaḥ práyataṃ purú tmánā /
tád arkarūpáṃ vimímānam eti /
dvā́daśa_are prátitiṣṭhati_íd vṛ́ṣā //
aśvāyánto gavyánto vājáyantaḥ /
hávāmahe tvā_úpaganta vā́ u /
ābhū́ṣantas tvā sumatáu návāyām /
vayám indra tvā śunám̐ huvema //

Commentaries (4)

Linked texts (5)