Pramāṇa · Search · About · API

Taittiriyabrahmana 2.6.1

Taittirīyabrāhmaṇa 2.6.1

Language
Sanskrit

2.6.1.1

svādvī́ṃ tvā svādúnā /
tīvrā́ṃ tīvréṇa /
amṛ́tām amṛ́tena /
mádhumatīṃ mádhumatā /
sṛjā́mi sám̐ sómena /
sómo 'sy aśvíbhyāṃ pacyasva /
sárasvatyai pacyasva /
índrāya sutrā́mṇe pacyasva //
pári_itó ṣiñcatā sutám /
sómo yá uttamám̐ havíḥ //

2.6.1.2

dadhanvā́[dadhanvā́n?] yó náryo apsv àntár ā́ /
suṣáva sómam ádribhiḥ //
punā́tu te parisrútam /
sómam̐ sū́ryasya duhitā́ /
vā́reṇa śáśvatā tánā //
vāyúḥ pūtáḥ pavítreṇa /
prā́ṅ sómo átidrutaḥ //

2.6.1.3

índrasya yújyaḥ sákhā //
bráhma kṣatráṃ pavate téja indriyám /
súrayā sómaḥ sutá ā́suto mádāya /
śukréṇa deva devátāḥ pipṛgdhi /
rásena_ánnaṃ yájamānāya dhehi //
kuvíd aṅga yávamanto yávaṃ cit /
yáthā dānty anupūrváṃ viyū́ya /
ihá_íha_eṣāṃ kṛṇuta bhójanāni /
yé barhíṣo námovṛktiṃ ná jagmúḥ //
upayāmágṛhīto 'sy aśvíbhyāṃ tvā júṣṭaṃ gṛhṇāmi //

2.6.1.4

sárasvatyā índrāya sutrā́mṇe /
eṣá te yónis téjase tvā /
vīryā̀ya tvā bálāya tvā //
téjo 'si téjo máyi dhehi /
vīryàm asi vīryàṃ máyi dhehi /
bálam asi bálaṃ máyi dhehi //
nā́nā hí vāṃ deváhitam̐ sádaḥ kṛtám /
mā́ sám̐sṛkṣāthāṃ paramé vyòman /
súrā tvám ási śuṣmiṇī sóma eṣáḥ /
mā́ mā him̐sīḥ svā́ṃ yónim āviśán //

2.6.1.5

upayāmágṛhīto 'sy āśvináṃ téjaḥ /
sārasvatáṃ vīryàm /
aindráṃ bálam //
eṣá te yónir módāya tvā /
ānandā́ya tvā máhase tvā //
ójo 'sy ójo máyi dhehi /
manyúr asi manyúṃ máyi dhehi /
máho 'si máho máyi dhehi /
sáho 'si sáho máyi dhehi //
yā́ vyāghráṃ víṣūcikā /
ubháu vṛ́kaṃ ca rákṣati /
śyenáṃ patatríṇam̐ sim̐hám /
sā́_imáṃ pātv ám̐hasaḥ //
saṃpṛ́caḥ stha sáṃ mā bhadréṇa pṛṅkta /
vipṛ́caḥ stha ví mā pāpmánā pṛṅkta //

Commentaries (4)

Linked texts (4)