Taittiriyabrahmana 2.6.10
Taittirīyabrāhmaṇa 2.6.10
- Language
- Sanskrit
2.6.10.1
deváṃ barhír índram̐ sudeváṃ deváiḥ /
vīrávatstīrṇáṃ védyām avardhayat /
vástor vṛtáṃ prá_aktor bhṛtám /
rāyā́ barhíṣmató 'tyagāt /
vasuváne vasudhéyasya vetu yája /
devī́r dvā́ra índram̐ saṃghāté /
viḍvī́r yā́mann avardhayan /
ā́ vatséna táruṇena kumāréṇa ca mīvitā́ ápa_árvāṇam /
reṇúkakāṭaṃ nudantām /
vasuváne vasudhéyasya viyantu yája //
2.6.10.2
devī́ uṣā́sānáktā /
índraṃ yajñé prayaty àhvetām /
dáivīr víśaḥ prā́yāsiṣṭām /
súprīte súdhite abhūtām /
vasuváne vasudhéyasya vītāṃ yája /
devī́ jóṣṭrī vásudhitī /
devám índram avardhatām /
áyāvy anyā́_aghā́ dvéṣām̐si /
ā́_anyā́_avākṣīd vásu vā́ryāṇi /
yájamānāya śikṣité //
2.6.10.3
vasuváne vasudhéyasya vītāṃ yája /
devī́ ūrjā́hutī dúghe sudúghe /
páyasā_índram avardhatām /
iṣam ū́rjam anyā́_avākṣīt /
ságdhim̐ sápītim anyā́ /
návena pū́rvaṃ dáyamāne /
purāṇéna návam /
ádhātām ū́rjam ūrjā́hutī vásu vā́ryāṇi /
yájamānāya śikṣité /
vasuváne vasudhéyasya vītāṃ yája //
2.6.10.4
devā́ dáivyā hótārā /
devám índram avardhatām /
hatā́ghaśam̐sāv ā́bhārṣṭāṃ vásu vā́ryāṇi /
yájamānāya śikṣitáu /
vasuváne vasudhéyasya vītāṃ yája /
devī́s tisrás tisró devī́ḥ /
pátim índram avardhayan /
áspṛkṣad bhā́ratī dívam /
rudráir yajñám̐ sarasvatī /
íḍā vásumatī gṛhā́n //
2.6.10.5
vasuváne vasudhéyasya viyantu yája /
devá índro nárāśám̐saḥ /
trivarūthás trivandhuráḥ /
devám índram avardhayat /
śaténa śitipṛṣṭhā́nām ā́hitaḥ /
sahásreṇa právartate /
mitrā́váruṇā_íd asya hotrám árhataḥ /
bṛ́haspátiḥ stotrám /
aśvínā_ā́dhvaryavam /
vasuváne vasudhéyasya vetu yája //
2.6.10.6
devá índro vánaspátiḥ /
híraṇyaparṇo mádhuśākhaḥ supippaláḥ /
devám índram avardhayat /
dívam ágreṇa_āprāt /
ā́_antárikṣaṃ pṛthivī́m adṛm̐hīt /
vasuváne vasudhéyasya vetu yája /
deváṃ barhír vā́ritīnām /
devám índram avardhayat /
svāsasthám índreṇa_ā́sannam /
anyā́ barhī́m̐ṣy abhyàbhūt /
vasuváne vasudhéyasya vetu yája /
devó agníḥ sviṣṭakṛ́t /
devám índram avardhayat /
svìṣṭaṃ kurvánt sviṣṭakṛ́t /
svìṣṭam adyá karotu naḥ /
vasuváne vasudhéyasya vetu yája //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (3)
- A Vedic Concordance — Maurice Bloomfield, English
- Yajurbrāhmaṇa — Sanskrit
- Vedic Index of Names and Subjects — Arthur A. Macdonell & A. Berriedale Keith, English