Taittiriyabrahmana 2.6.11
Taittirīyabrāhmaṇa 2.6.11
- Language
- Sanskrit
2.6.11.1
hótā yakṣat samídhā_agním iḍás padé /
aśvínā_índram̐ sárasvatīm /
ajó dhūmó ná godhū́maiḥ kvàlair bheṣajám /
mádhu śáṣpair ná téja indriyám /
páyaḥ sómaḥ parisrútā ghṛtáṃ mádhu /
viyántv ā́jyasya hótar yája /
hótā yakṣat tánūnápāt_sárasvatī /
ávir meṣó ná bheṣajám /
pathā́ mádhumatā_ā́bharan /
aśvínā_índrāya vīryàm //
2.6.11.2
bádarair upavā́kābhir bheṣajáṃ tókmabhiḥ /
páyaḥ sómaḥ parisrútā ghṛtáṃ mádhu /
viyántv ā́jyasya hótar yája /
hótā yákṣan nárāśám̐saṃ ná nagnáhum /
pátim̐ súrāyai bheṣajám /
meṣáḥ sárasvatī bhiṣák /
rátho ná candry àśvínor vapā́ índrasya vīryàm /
bádarair upavā́kābhir bheṣajáṃ tókmabhiḥ /
páyaḥ sómaḥ parisrútā ghṛtáṃ mádhu /
viyántv ā́jyasya hótar yája //
2.6.11.3
hótā yakṣad iḍā_íḍitá ājúhvānaḥ sárasvatīm /
índraṃ bálena vardháyan /
ṛsabhéṇa gávā_indriyám /
aśvínā_índrāya vīryàm /
yávaiḥ karkándhubhiḥ /
mádhu lājáir ná mā́saram /
páyaḥ sómaḥ parisrútā ghṛtáṃ mádhu /
viyántv ā́jyasya hótar yája /
hótā yakṣad barhíḥ, suṣṭárīmó 'rṇamradāḥ /
bhiṣáṅ, nā́satyā //
2.6.11.4
bhiṣájā_aśvínā,_áśvā śíśumatī /
bhiṣág, dhenúḥ sárasvatī /
bhiṣág, duhá índrāya bheṣajám /
páyaḥ sómaḥ parisrútā ghṛtáṃ mádhu /
viyántv ā́jyasya hótar yája /
hótā yakṣad dúro díśaḥ /
kavaṣyò ná vyácasvatīḥ /
aśvíbhyāṃ ná dúro díśaḥ /
índro ná ródasī dúghe /
duhé kā́mānt sárasvatī //
2.6.11.5
aśvínā_índrāya bheṣajám /
śukráṃ ná jyótir indriyám /
páyaḥ sómaḥ parisrútā ghṛtáṃ mádhu /
viyántv ā́jyasya hótar yája /
hótā yakṣat supéśasā_uṣé náktaṃ dívā /
aśvínā saṃjānāné /
sámañjāte sárasvatyā /
tvíṣim índre ná bheṣajám /
śyenó ná rájasā hṛdā́ /
páyaḥ sómaḥ parisrútā ghṛtáṃ mádhu //
2.6.11.6
viyántv ā́jyasya hótar yája /
hótā yakṣad dáivyā hótārā bhiṣájā_aśvínā /
índraṃ ná jā́gṛvī dívā náktaṃ ná bheṣajáiḥ /
śū́ṣam̐ sárasvatī bhiṣák /
sī́sena duha indriyám /
páyaḥ sómaḥ parisrútā ghṛtáṃ mádhu /
viyántv ā́jyasya hótar yája /
hótā yakṣat tisró devī́rná bheṣajám /
tráyas tridhā́tavo 'pásaḥ /
rūpám índre hiraṇyáyam //
2.6.11.7
aśvínā_íḍā ná bhā́ratī /
vācā́ sárasvatī /
máha, índrāya dadhur indriyám /
páyaḥ sómaḥ parisrútā ghṛtáṃ mádhu /
viyántv ā́jyasya hótar yája /
hótā yakṣat tváṣṭāram índram aśvínā /
bhīṣájaṃ ná sárasvatīm /
ójo ná jūtír indriyám /
vṛ́ko ná rabhasó bhiṣák /
yáśaḥ súrayā bheṣajám //
2.6.11.8
śriyā́ ná mā́saram /
páyaḥ sómaḥ parisrútā ghṛtáṃ mádhu /
viyántv ā́jyasya hótar yája /
hótā yakṣad vánaspátim /
śamitā́ram̐ śatákratum /
bhīmáṃ ná manyúm̐ rā́jānaṃ vyāghráṃ námasā_aśvínā, bhā́mam sárasvatī bhiṣák /
índrāya duha indriyám /
páyaḥ sómaḥ parisrútā ghṛtáṃ mádhu viyántv ā́jyasya hótar yája //
2.6.11.9
hótā yakṣad agním̐ svā́hā_ā́jyasya stokā́nām /
svā́hā médasāṃ pṛ́thak /
svā́hā chā́gam aśvíbhyām /
svā́hā meṣám̐ sárasvatyai /
svā́hā_ṛṣabhám índrāya sim̐hā́ya sáhasā_indriyám /
svā́hā_agníṃ ná bheṣajám /
svā́hā sómam indriyám /
svā́hā_índram̐ sutrā́mānam̐ savitā́raṃ váruṇaṃ bhiṣájāṃ pátim /
svā́hā vánaspátiṃ priyáṃ pā́tho ná bheṣajám /
sváhā devā́m̐ ājyapā́n //
2.6.11.10
svā́hā_agním̐ hotrā́j juṣāṇó agnír bheṣajám /
páyaḥ sómaḥ parisrútā ghṛtáṃ madhu /
viyántv ā́jyasya hótar yája /
hótā yakṣad aśvínā sárasvatīm índram̐ sutrā́māṇam /
imé sómāḥ surā́māṇaḥ /
chā́gair ná meṣáir ṛṣabháiḥ sutā́ḥ /
śaṣpair ná tókmabhiḥ /
lājáir máhasvantaḥ /
mádā mā́sareṇa páriṣkṛtāḥ /
śukrā́ḥ páyasvanto 'mṛ́tāḥ /
prásthitā vo madhuścútaḥ tā́n aśvínā sárasvatī_índraḥ sutrā́mā vṛtrahā́ /
juṣántām̐ saumyáṃ mádhu /
píbantu mádantu viyántu sómam /
hótar yája //
Commentaries (5)
- Yajurbrahmaṇabhāṣya — Sāyaṇācārya, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
Linked texts (3)
- Vedapadapāṭha — Sanskrit
- Yajurveda (ed. Wasudev Laxman Sastri Pansikar) — Sanskrit
- Mantrabhāṣya (A) — A, Sanskrit
Discussed in (1)
- A Vedic Concordance — Bloomfield 1906, English