Taittiriyabrahmana 2.6.12
Taittirīyabrāhmaṇa 2.6.12
- Language
- Sanskrit
2.6.12.1
sámiddho agnír aśvinā /
taptó gharmó virā́ṭ sutáḥ /
duhé dhenúḥ sárasvatī /
sómam̐ śukrám ihá_indriyám /
tanūpā́ bhiṣájā suté /
aśvínā_ubhā́ sárasvatī /
mádhvā rájām̐si_indriyám /
índrāya pathíbhir vahān /
índrāya_índum̐ sárasvatī /
nárāśám̐sena nagnáhuḥ //
2.6.12.2
ádhātām aśvínā mádhu /
bheṣajáṃ bhiṣájā suté /
ājúhvānā sárasvatī /
índrāya_indriyā́ṇi vīryàm /
íḍābhir aśvināv íṣam /
sámūrjam̐ sám̐ rayíṃ dadhuḥ /
áśvinā námuceḥ sutám /
sómam̐ śukráṃ parisrútā /
sárasvatī tám ā́bharat /
barhíṣā_índrāya pā́tave //
2.6.12.3
kavaṣyò ná vyácasvatīḥ /
aśvíbhyāṃ ná dúro díśaḥ /
índro ná ródasī dúghe /
duhé kā́mānt sárasvatī /
uṣā́sā náktam aśvinā /
dívā_índram̐ sāyám indriyáiḥ /
saṃjānāné supéśasā /
sámañjāte sárasvatyā pātáṃ no aśvinā dívā /
pāhí náktam̐ sarasvati //
2.6.12.4
dáivyā hotārā bhiṣajā /
pātám índram̐ sácā suté /
tisrás tredhā́ sárasvatī /
aśvínā bhā́rati_íḍā /
tīvráṃ parisrútā sómam /
índrāya suṣavur mádam /
áśvinā bheṣajáṃ mádhu /
bheṣajáṃ naḥ sárasvatī /
índre tváṣṭā yáśaḥ śríyam /
rūpám̐_rūpam adhuḥ suté /
ṛtuthā́_índro vánaspátiḥ /
śaśamānáḥ parisrútā /
kīlā́lam aśvíbhyāṃ mádhu /
duhé dhenúḥ sárasvatī /
góbhir ná sómam aśvinā /
mā́sareṇa pariṣkṛ́tā /
sámadhātām̐ sárasvatyā /
svā́hā_índre sutáṃ mádhu //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (5)
- A Vedic Concordance — Maurice Bloomfield, English
- Kāṇvasaṃhitā Śuklayajurveda — Sanskrit
- Kāṇvaśākhā — Sanskrit
- Yajussaṃhitā — Sanskrit
- Yajurbrāhmaṇa — Sanskrit