Taittiriyabrahmana 2.6.14
Taittirīyabrāhmaṇa 2.6.14
- Language
- Sanskrit
2.6.14.1
deváṃ barhíḥ sárasvatī /
sudevám índre aśvínā /
téjo ná cákṣur akṣyóḥ /
barhíṣā dadhur indriyám /
vasuváne vasudhéyasya viyantu yája /
devī́r dvā́ro aśvínā /
bhiṣájā_índre sárasvatī /
prāṇáṃ ná vīryàṃ nasí /
dvā́ro dadhur indriyám /
vasuváne vasudhéyasya viyantu yája
2.6.14.2
devī́ uṣā́sāv aśvínā /
bhiṣájā_índre sárasvatī /
bálaṃ ná vā́cam āsyè /
uṣā́bhyāṃ dadhur indriyám /
vasumáne vasudhéyasya viyantu yája /
devī́ jóṣṭrī aśvínā sutrā́mā_índre sárasvatī /
śrótraṃ ná kárṇayor yáśaḥ /
jóṣṭrībhyāṃ dadhur indriyám /
vasuváne vasudhéyasya viyantu yája //
2.6.14.3
devī́ ūrjā́hutī dúghe sudúghe /
páyasā_índram̐ sárasvaty aśvínā bhiṣájā_avata /
śukráṃ ná jyótiḥ stánayor ā́hutī dhatta indriyám /
vasuváne vasudhéyasya viyantu yája /
devā́ devā́nāṃ bhiṣájā /
hótārāv índram aśvínā /
vaṣaṭkāráiḥ sárasvatī /
tvíṣiṃ ná hṛ́daye matím /
hótṛbhyāṃ dadhur indriyám /
vasuváne vasudhéyasya viyantu yája //
2.6.14.4
devī́s tisrás tisró devī́ḥ /
sárasvaty aśvínā bhā́ratī_íḍā /
śū́ṣaṃ ná mádhye nā́bhyām /
índrāya dadhur indriyám /
vasuváne vasudhéyasya viyantu yája /
devá índro nárāśam̐saḥ /
trivarūtháḥ sárasvatyā_aśvíbhyām īyate ráthaḥ /
réto ná rūpám amṛ́taṃ janítram /
índrāya tváṣṭā dádhad inriyā́ṇi vasuváne vasudhéyasya viyantu yája //
2.6.14.5
devá índro vánaspátiḥ /
híraṇyaparṇo aśvíbhyām /
sárasvatyāḥ supippaláḥ /
índrāya pacyate mádhu /
ójo ná jūtím ṛṣabhó ná bhā́mam /
vánasapátir no dádhad indriyā́ṇi /
vasuváne vasudhéyasya viyantu yája /
deváṃ barhír vā́ritīnām /
adhvaré stīrṇám aśvíbhyām /
ū́rṇamradāḥ sárasvatyāḥ //
2.6.14.6
syonám indra te sádaḥ /
īśā́yai manyúm̐ rā́jānaṃ barhíṣā dadhur indriyám /
vasuváne vasudhéyasya viyantu yája /
devó agníḥ sviṣṭakṛ́t /
devā́n yakṣad yathā_yathám /
hótārāv índram aśvínā /
vācā́ vā́cam̐ sárasvatīm /
agním̐ sómam̐ sviṣṭakṛ́t /
svìṣṭa índraḥ sutrā́mā savitā́ váruṇo bhiṣák /
iṣṭó devó vánasapátiḥ /
svìṣṭā devā́ ājyapā́ḥ /
iṣṭó agníragnínā /
hótā hotré sviṣṭakṛ́t /
yáśo ná dádhad indriyám /
ū́rjam ápacitim̐ svadhā́m /
vasuváne vasudhéyasya viyantu yája //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (6)
- Mādhyandina (ed. Shuklayajurveda) — Sanskrit
- A Vedic Concordance — Maurice Bloomfield, English
- Vedapadapāṭha — Sanskrit
- Yajussaṃhitā — Sanskrit
- Yajurbrāhmaṇa — Sanskrit
- Yajurveda (ed. Wasudev Laxman Sastri Pansikar) — Sanskrit