Taittiriyabrahmana 2.6.16
Taittirīyabrāhmaṇa 2.6.16
- Language
- Sanskrit
2.6.16.1
uśántas tvā havāmaha, ā́ no agne suketúnā /
tvám̐ soma mahé bhágaṃ, tvám̐ soma prá cikito manīṣā́ /
tváyā hí naḥ pitáraḥ soma pū́rve, tvám̐ soma pitṛ́bhiḥ saṃvidānáḥ /
bárhiṣadaḥ pitára, ā́_aháṃ pitṛ́̄n /
úpahūtāḥ pitáro, 'gniṣvāttāḥ pitaraḥ /
agniṣvāttā́n ṛtumáto havāmahe /
nárāśám̐se somapītháṃ yá āśúḥ /
té no árvantaḥ suhávā bhavantu /
śáṃ no bhavantu dvipáde śáṃ cátuṣpade /
yé agniṣvāttā́ yé 'nagniṣvāttāḥ //
2.6.16.2
am̐homúcaḥ pitáraḥ somyā́saḥ /
páré 'vare 'mṛ́tāso bhávantaḥ /
ádhibruvantu té avantv asmā́n /
vānyā̀yai dugdhé juṣámānāḥ karambhám /
udī́rāṇā ávare páre ca /
agniṣvāttā́ ṛtúbhiḥ saṃvidānā́ḥ /
índravanto havír idáṃ juṣantām /
yád agne kavyavāhana, tvám agna īḍitó jātavedaḥ /
mā́talī kavyáiḥ /
yé tātṛpúr devatrā́ jéhamānāḥ /
hotrāvṛ́dhaḥ stómataṣṭāso arkáiḥ /
ā́_agne yāhi suvidátrebhir arvā́ṅ /
satyáiḥ kavyáiḥ pitṛ́bhir gharmasádbhiḥ /
havyavā́ham ajáraṃ purupriyám /
agníṃ ghṛténa havíṣā saparyán /
úpāsadaṃ kavyavā́haṃ pitṛṇā́m /
sá naḥ prajā́ṃ vīrávatīm̐ sámṛṇvatu //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (3)
- A Vedic Concordance — Maurice Bloomfield, English
- Yajurbrāhmaṇa — Sanskrit
- Vedic Index of Names and Subjects — Arthur A. Macdonell & A. Berriedale Keith, English