Taittiriyabrahmana 2.6.17
Taittirīyabrāhmaṇa 2.6.17
- Language
- Sanskrit
2.6.17.1
hótā yakṣad iḍás padé /
samidhānáṃ mahád yáśaḥ /
suṣamiddhaṃ váreṇyam /
agním índraṃ vayodhásam /
gāyatrī́ṃ chánda indriyám /
tryáviṃ gā́ṃ váyo dádhat /
vétv ā́jyasya hótar yája /
hótā yakṣat_śúcivratam /
tánūnápātam udbhídam /
yáṃ gárbham áditir dadhé //
2.6.17.2
śúcim índraṃ vayodhásam /
uṣṇíhaṃ chánda indriyám /
dityavā́haṃ gā́ṃ váyo dádhat /
vétv ā́jyasya hótar yája /
hótā yakṣad īḍényam /
īḍitáṃ vṛtrahántamam /
íḍābhir ī́ḍyam̐ sáhaḥ /
sómam índraṃ vayodhásam /
anuṣṭúbhaṃ chánda indriyám /
trivatsáṃ gā́ṃ váyo dádhat //
2.6.17.3
vétv ā́jyasya hótar yája /
hótā yakṣat subarhiṣádam /
pūṣaṇvántam ámartyam /
sī́dantaṃ barhíṣi priyé /
amṛ́tā_índraṃ vayodhásam /
bṛhatī́ṃ chánda indriyám /
páñcāviṃ gā́ṃ váyo dádhat /
vétv ā́jyasya hótar yája /
hótā yakṣad yvácasvatīḥ /
suprāyaṇā́ ṛtāvṛ́dhaḥ //
2.6.17.4
dvā́ro devī́r hiraṇyáyīḥ /
brahmā́ṇa índraṃ vayodhásam /
paṅktíṃ chánda ihá_indriyám /
turyavā́haṃ gā́ṃ váyo dádhat /
vétv ā́jyasya hótar yája /
hótā yakṣat supéśase /
suśilpé bṛhatī́ ubhé /
náktoṣā́sā ná darśaté /
víśvam índraṃ vayodhásam /
triṣṭúbhaṃ chánda indriyám //
2.6.17.5
ṣaṣṭhavā́haṃ gā́ṃ váyo dádhat /
vétv ā́jyasya hótar yája /
hótā yakṣat prácetasā /
devā́nām uttamáṃ yáśaḥ /
hótārā dáivyā kavī́ /
sayújā_índraṃ vayodhásam /
jágatīṃ chánda ihá_indriyám /
anaḍvā́haṃ gā́ṃ váyo dádhat /
vétv ā́jyasya hótar yája /
hótā yakṣat péśasvatīḥ //
2.6.17.6
tisró devī́r hiraṇyáyīḥ /
bhā́ratīr bṛhatī́r mahī́ḥ /
pátim índraṃ vayodhásam /
virā́jaṃ chánda ihá_indriyám /
dhenúṃ gā́ṃ ná váyo dádhat /
vétv ā́jyasya hótar yája /
hótā yakṣat surétasam /
tváṣṭāraṃ puṣṭivárdhanam /
rūpā́ṇi bíbhrataṃ pṛ́thak /
púṣṭim índraṃ vayodhásam //
2.6.17.7
dvipádaṃ chánda ihá_indriyám /
ukṣā́ṇaṃ gā́ṃ ná váyo dádhat /
vétv ā́jyasya hótar yája /
hótā yakṣat_śatákratum /
híraṇyaparṇam ukthínam /
raśanā́ṃ bíbhrataṃ vaśím /
bhágam índraṃ vayodhásam /
kakúbhaṃ chánda ihá_indriyám /
vaśā́ṃ vehátaṃ gā́ṃ ná váyo dádhat /
vétv ā́jyasya hótar yája /
hótā yakṣat svā́hākṛtīḥ /
agníṃ gṛhápatiṃ pṛ́thak /
váruṇaṃ bheṣajáṃ kavím /
kṣattrám índraṃ vayodhásam /
áticchandasaṃ chánda indriyám /
bṛhád ṛṣabháṃ gā́ṃ váyo dádhat /
vétv ā́jyasya hótar yája //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (4)
- A Vedic Concordance — Maurice Bloomfield, English
- Vedapadapāṭha — Sanskrit
- Kāṇvaśākhā — Sanskrit
- Yajurbrāhmaṇa — Sanskrit