Taittiriyabrahmana 2.6.18
Taittirīyabrāhmaṇa 2.6.18
- Language
- Sanskrit
2.6.18.1
sámiddho agníḥ samídhā /
súṣamiddho váreṇyaḥ /
gāyatrī́ chánda indriyám /
tryávir gáur váyo dadhuḥ /
tánūnápāt_śúcivrataḥ /
tanūnapā́t_ ca sárasvatī /
uṣṇík chánda indriyám dityavā́ḍ gáur váyo dadhuḥ /
íḍābhir agnír ī́ḍyaḥ /
sómo devó ámartyḥ //
2.6.18.2
anuṣṭúp chánda indriyám /
trivatsó gáur váyo dadhuḥ /
subarhír agníḥ pūṣaṇvā́n /
stīrṇábarhir ámartyaḥ /
bṛhatī́ chánda indriyám /
páñcāvir gáur váyo dadhuḥ /
dúro devī́r díśo mahī́ḥ /
brahmā́ devó bṛ́haspátiḥ /
paṅktíś chánda ihá_indriyám /
turyavā́ḍ gáur váyo dadhuḥ //
2.6.18.3
uṣé yahvī́ supéśasā /
víśve devā́ ámartyāḥ /
triṣṭúp chánda indriyám /
paṣṭhavā́ḍ gáur váyo dadhuḥ /
dáivyā hótārā bhiṣájā /
índreṇa sayújā yujā́ /
jágatī chánda ihá_indriyám /
anaḍvā́n gáur váyo dadhuḥ /
tisrá íḍā sárasvatī /
bhā́ratī marúto víśaḥ //
2.6.18.4
virā́ṭ chánda ihá_indriyám /
dhenúr gáur ná váyo dadhuḥ /
tváṣṭā turī́po ádbhutaḥ /
indrāgnī́ puṣṭivárdhanā /
dvipā́t_ chánda ihá_indriyám /
ukṣā́ gáur ná váyo dadhuḥ /
śamitā́ no vánaspátiḥ /
savitā́ prasuván bhágam /
kakúc chánda ihá_indriyám /
vaśā́ vehád gáur ná váyo dadhuḥ /
svā́hā yajñáṃ váruṇaḥ /
sukṣatró bheṣajáṃ karat /áticchandāś chánda indriyám /
bṛhád ṛṣabhó gáur váyo dadhuḥ //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (5)
- Maitrāyaṇīsaṃhitā — Sanskrit
- A Vedic Concordance — Maurice Bloomfield, English
- Yajurbrāhmaṇa — Sanskrit
- Altindische Grammatik — Jacob Wackernagel & Albert Debrunner, German
- Kāṭhakaśākhā — Sanskrit