Taittiriyabrahmana 2.6.20
Taittirīyabrāhmaṇa 2.6.20
- Language
- Sanskrit
2.6.20.1
deváṃ barhír índraṃ vayodhásam /
deváṃ devámavardhayat /
gāyatriyā́ chándasā_indriyám /
téja índre váyo dádhat /
vasuváne vasudhéyasya vetu yája /
devī́r dvā́ro devám índraṃ vayodhásam /
devī́r devám avardhayan /
uṣṇíhā chándasā_indriyám /
prāṇám índre váyo dádhat /
vasuváne vasudhéyasya viyantu yája //
2.6.20.2
devī́ deváṃ vayodhásam /
uṣé índram avardhatām /
anuṣṭúbhā chándasā_indriyám /
vā́cam índre váyo dádhat /
vasuváne vasudhéyasya vītāṃ yája /
devī́ jóṣṭrī devám índraṃ vayodhásam /
devī́ devám avardhatām /
bṛhatyā́ chándasā_indriyám /
śrótram índre váyo dádhat /
vasuváne vasudhéyasya vītāṃ yája //
2.6.20.3
devī́ ūrjā́hutī devám índraṃ vayodhásam /
devī́ devám avardhatām /
paṅktyā́ chándasā_indriyám /
śukrám índre váyo dádhat /
vasuváne vasudhéyasya vītāṃ yája /
devā́ dáivyā hótārā devám índraṃ vayodhásam /
devā́ devám avardhatām /
triṣṭúbhā chándasā_indriyám /
tvíṣim índre váyo dádhat /
vasuváne vasudhéyasya vītāṃ yája //
2.6.20.4
devī́s tisrás tisró devī́r vayodhásam /
pátim índram avardhayan /
jágatyā chándasā_indriyám /
bálam índre váyo dádhat /
vasuváne vasudhéyasya viyantu yája /
devó nárāśám̐so devám índraṃ vayodhásam /
devó devám avardhayat /
virā́jā chándasā_indriyám /
réta índre váyo dádhat /
vasuváne vasudhéyasya vetu yája //
2.6.20.5
devó vánaspátir devám índraṃ vayodhásam /
devó devám avardhayat /
dvipádā chándasā_indriyám /
bhágam índre váyo dádhat /
vasuváne vasudhéyasya vetu yája /
deváṃ barhír vā́ritīnāṃ devám índraṃ vayodhásam /
devó devám avardhayat /
kakúbhā chándasā_indriyám /
yáśa índre váyo dádhat /
vasuváne vasudhéyasya vetu yája /
devó agníḥ sviṣṭakṛ́d devám índraṃ vayodhásam /
devó devám avardhayat /
áticchandasā chándasā_indriyám /
kṣattrám índre váyo dádhat /
vasuváne vasudhéyasya vetu yája //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Yajurbrahmaṇabhāṣya — Sāyaṇācārya, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
Discussed in (1)
- A Vedic Concordance — Bloomfield 1906, English