Pramāṇa · Search · About · API

Taittiriyabrahmana 2.6.3

Taittirīyabrāhmaṇa 2.6.3

Language
Sanskrit

2.6.3.1

súrāvantaṃ barhiṣádam̐ suvī́ram /
yajñám̐ hinvanti mahiṣā́ námobhiḥ /
dádhānāḥ sómaṃ diví devátāsu /
mádema_índraṃ yájamānāḥ svarkā́ḥ //
yás te rásaḥ sáṃbhṛta óṣadhīṣu /
sómasya śúṣmaḥ súrayā sutásya /
téna jinva yájamānaṃ mádena /
sárasvatīm aśvínāv índram agním //
yám aśvínā námucer āsurā́d ádhi /
sárasvaty ásanod indriyā́ya //

2.6.3.2

imáṃ tám̐ śukráṃ mádhumantam índum /
sómam̐ rā́jānam ihá bhakṣayāmi /
yád átra riptám̐ rasínaḥ sutásya /
yád índro ápibat_śácībhiḥ /
aháṃ tád asya mánasā śivéna /
sómam̐ rā́jānam ihá bhakṣayāmi //
pitṛ́bhyaḥ svadhāvíbhyaḥ svadhā́ námaḥ /
pitāmahébhyaḥ svadhāvíbhyaḥ svadhā́ námaḥ /
prápitāmahebhyaḥ svadhāvíbhyaḥ svadhā́ námaḥ /
ákṣan pitáraḥ //

2.6.3.3

ámīmadanta pitáraḥ /
átītṛpanta pitáraḥ /
ámīmṛjanta pitáraḥ /
pítaraḥ śúndhadhvam //
punántu mā pitáraḥ somyā́saḥ /
punántu mā pitāmahā́ḥ /
punántu prápitāmahāḥ /
pavítreṇa śata_ā́yuṣā //
punántu mā pitāmahā́ḥ /
punántu prápitāmahāḥ //

2.6.3.4

pavítreṇa śata_ā́yuṣā /
víśvam ā́yur vyàśnavai //
ágna ā́yūm̐ṣi pavasé, 'gne pávasva /
pávamānaḥ súvarjánaḥ, punántu mā devajanā́ḥ /
jā́tavedaḥ pavítravad, yát te pavítram arcíṣi /
ubhā́bhyāṃ deva savitar, vaiśvadevī́ punatī́ /
yé samānā́ḥ sámanasaḥ /
pitáro yamarā́jye /
téṣāṃ lokáḥ svadhā́ námaḥ /
yájñó devéṣu kalpatām //

2.6.3.5

yé sajātā́ḥ sámanasaḥ /
jīvā́ jīvéṣu māmakā́ḥ /
téṣām̐ śrī́r máyi kalpatām /
asmín_loké śatám̐ sámāḥ /
dvé srutī́ aśṛṇavaṃ pitṛṇā́m /
aháṃ devā́nām utá mártyānām /
yā́bhyām idáṃ víśvam éjat sámeti /
yád antarā́ pitáraṃ mātáraṃ ca /
idám̐ havíḥ prajánanaṃ me astu /
dáśavīram̐ sarvágaṇam̐ svastáye /
ātmasáni prajāsáni /
paśusány abhayasáni lokasáni /
agníḥ prajā́ṃ bahulā́ṃ me karotu /
ánnaṃ páyo réto asmā́su dhatta /
rāyás póṣam íṣam ū́rjam asmā́su dīdharat svā́hā //

Commentaries (4)

Linked texts (3)