Pramāṇa · Search · About · API

Taittiriyabrahmana 2.6.4

Taittirīyabrāhmaṇa 2.6.4

Language
Sanskrit

2.6.4.1

sī́sena tántraṃ mánasā manīṣíṇaḥ /
ūrṇāsūtréṇa kaváyo vayanti /
aśvínā yajñám̐ savitā́ sárasvatī /
índrasya rūpáṃ váruṇo bhiṣajyán /
tád asya rūpám amṛ́tam̐ śácībhiḥ /
tisró dadhur devátāḥ sam̐rarāṇā́ḥ /
lómāni śáṣpair bahudhā́ ná tókmabhiḥ /
tvág asya mām̐sám abhavanná lājā́ḥ /
tád aśvínā bhiṣájā rudrávartanī /
sárasvatī vayati peśo ántaraḥ //

2.6.4.2

ásthi majjā́naṃ mā́saraiḥ /
kārotaréṇa dádhato gávāṃ tvací /
sárasvatī mánasā peśaláṃ vásu /
nā́satyābhyāṃ vayati darśatáṃ vápuḥ /
rásaṃ parisrútā ná róhitam /
nagnáhur dhī́ras tásaraṃ ná véma /
páyasā śukrám amṛ́taṃ janítram /
súrayā mū́trāj janayanti rétaḥ /
ápa_ámatiṃ durmatíṃ bā́dhamānāḥ /
ū́vadhyaṃ vā́tam̐ sabúvaṃ tád ārā́t //

2.6.4.3

índraḥ sutrā́mā hṛ́dayena satyám /
puroḍā́śena savitā́ jajāna /
yákṛt klomā́naṃ váruṇo bhiṣajyán /
mátasne vāyavyàir na mināti pittám /
āntrā́ṇi sthālī́ mádhu pínvamānā /
gúdā pā́trāṇi sudúghā ná dhenúḥ /
śyenásya pátraṃ ná plīhā́ śácībhiḥ /
āsandī́ nā́bhir udáraṃ ná mātā́ /
kumbhó vaniṣṭhúr janitā́ śácībhiḥ /
yásminn ágre yónyāṃ gárbho antáḥ //

2.6.4.4

plāśīr vyàktaḥ śatádhāra útsaḥ /
duhé ná kumbhī́m̐ svadhā́ṃ pitṛ́bhyaḥ /
múkham̐ sád asya śíra ít sádena /
jihvā́ pavítram aśvínā sám̐ sárasvatī /
cápyaṃ ná pāyúr bhiṣág asya vā́laḥ /
vastír ná śépo hárasā tarasvī́ /
aśvíbhyāṃ cákṣur amṛ́taṃ gráhābhyām /
chā́gena téjo havíṣā śṛténa /
pákṣmāṇi godhū́maiḥ kvàlair utā́ni /
péśo ná śuklám ásitaṃ vasāte //

2.6.4.5

ávir ná meṣó nasí vīryā̀ya /
prāṇásya pánthā amṛ́to gráhābhyām /
sárasvaty úpa vā́kair vyānám /
násyāni barhír bádarairjajāna /
índrasya rūpám ṛṣabhó bálāya /
kárṇabhyām̐ śrótram amṛ́taṃ gráhābhyām /
yávā ná barhír bhruví késarāṇi /
karkándhu jajñe mádhu sāragháṃ múkhāt /
ātmánn upásthe ná vṛ́kasya lóma /
múkhe śmáśrūṇi ná vyāghralomám //

2.6.4.6

kéśā ná śīrṣán yáśase śriyái śíkhā /
sim̐hásya lóma tvíṣir indriyā́ṇi /
áṅgāny ātmán bhiṣájā tád aśvínā /
ātmā́nam áṅgaiḥ sámadhāt sárasvatī /
índrasya rūpám̐ śatámānam ā́yuḥ /
candréṇa jyótir amṛ́taṃ dádhānā /
sárasvatī yónyāṃ gárbham antáḥ /
aśvíbhyāṃ pátnī súkṛtaṃ bibharti /
apā́m̐ rásena váruṇo ná sā́mnā /
índram̐ śriyái janáyann apsú rā́jā /
téjaḥ paśūnā́m̐ havír indriyā́vat /
parisrútā páyasā sāragháṃ mádhu /
aśvíbhyāṃ dugdháṃ bhiṣájā sárasvatyā, sutāsutā́bhyām amṛ́taḥ sóma índuḥ //

Commentaries (4)

Linked texts (10)