Pramāṇa · Search · About · API

Taittiriyabrahmana 2.6.5

Taittirīyabrāhmaṇa 2.6.5

Language
Sanskrit

2.6.5.1

mitrò 'si váruṇo 'si /
sám aháṃ víśvair deváiḥ /
kṣatrásya nā́bhir asi /
kṣatrásya yónir asi /
syonā́m ā́sīda /
suṣádām ā́sīda /
mā́ tvā him̐sīt /
mā́ mā him̐sīt /
níṣasāda dhṛtávrato váruṇaḥ /
pastyā̀sv ā́ //

2.6.5.2

sā́mrājyāya sukrátuḥ /
devásya tvā savitúḥ prasavé /
aśvínor bāhúbhyām /
pūṣṇó hástābhyām /
aśvínor bháiṣajyena /
téjase brahmavarcasā́ya_abhíṣiñcāmi /
devásya tvā savitúḥ prasavé /
aśvínor bāhúbhyām /
pūṣṇó hástābhyām /
sárasvatyai bháiṣajyena //

2.6.5.3

vīryā̀ya_annā́dyāya_abhíṣiñcāmi /
devásya tvā savitúḥ prasavé /
aśvínor bahúbhyām /
pūṣṇó hástābhyām /
índrasya_indriyéṇa /
śriyái yáśase bálāya_abhíṣiñcāmi /
kò 'si katamò 'si /
kásmai tvā kā́ya tvā /
súślokā3m̐ súmaṅgalā3m̐ sátyarājā́3n /
śíro me śrī́ḥ //

2.6.5.4

yáśo múkham /
tvíṣiḥ kéśāś ca śmáśrūṇi /
rā́jā me prāṇò 'mṛ́tam /
samrā́ṭ cákṣuḥ /
virā́j_śrótram /
jihvā́ me bhadrám /
vā́ṅ mahaḥ /
máno manyúḥ /
svarāḍ bhā́maḥ /
módāḥ pramodā́ aṅgúlīr áṅgāni //

2.6.5.5

cittáṃ me sáhaḥ /
bāhū́ me bálam indriyám /
hástau me kárma vīryàm /
ātmā́ kṣatrám úro máma /
pṛṣṭī́r me rāṣṭram udáram, ám̐sau grīvā́ś ca śróṇyau /
ūrū́ aratnī́ jā́nunī /
víśo mé 'ṅgāni sarvátaḥ /
nā́bhir me cittáṃ vijñā́nam /
pāyúr mé 'pacitir bhasát //

2.6.5.6

ānandanandā́v āṇḍáu me /
bhágaḥ sáubhāgyaṃ pásaḥ /
jáṅghābhyāṃ padbhyā́ṃ dhármo 'smi /
viśí rā́jā prátiṣṭhitaḥ /
práti kṣtré prátitiṣṭhati rāṣṭré /
práty áśveṣu prátitiṣṭhāmi góṣu /
práty aṅgeṣu prátitiṣṭhāmy ātmán /
práti prāṇéṣu prátitiṣṭhāmi puṣṭé /
práti dyā́vāpṛthivyóḥ /
prátitiṣṭhāmi yajñé //

2.6.5.7

trayā́ devā́ ékādaśa /
trayastrim̐śā́ḥ surā́dhasaḥ /
bṛ́haspátipurohitāḥ /
devásya savitúḥ savé /
devā́ deváir avantu mā /
prathamā́ dvitī́yaiḥ /
dvitī́yās tṛtī́yaiḥ /
tṛtī́yāḥ satyéna /
satyáṃ yajñéna /
yajñó yájurbhiḥ //

2.6.5.8

yájūm̐ṣi sā́mabhiḥ /
sā́māny ṛgbhíḥ /
ṛ́co yājyā̀bhiḥ /
yājyā̀ vaṣaṭkāráiḥ /
vaṣaṭkārā́ ā́hutibhiḥ /
ā́hutayo me kā́mānt sámardhayantu /
bhū́ḥ svā́hā /
lómāni práyatir máma /
tváṅ ma ā́natir ā́gatiḥ /
mām̐sáṃ ma úpanatiḥ vásv ásthi /
majjā́ ma ā́natiḥ //

Commentaries (4)

Linked texts (6)