Pramāṇa · Search · About · API

Taittiriyabrahmana 2.6.6

Taittirīyabrāhmaṇa 2.6.6

Language
Sanskrit

2.6.6.1

yád devā devahéḍanam /
dévāsaś cakṛmā́ vayám /
agnír mā tásmād énasaḥ /
víśvān muñcatv ám̐hasaḥ /
yádi dívā yádi náktam /
énām̐si cakṛmā́ vayám /
vāyúr mā tásmād énasaḥ /
víśvān muñcatv ám̐hasaḥ /
yádi jā́grad yádi svápne /
énām̐si cakṛmā́ vayám //

2.6.6.2

sū́ryo mā tásmād énasaḥ /
víśvān muñcatv ám̐hasaḥ /
yád grā́me yád áraṇye /
yát sabhā́yāṃ yád indriyé /
yát_śūdré yád aryè /
énaś cakṛmā́ vayám /
yád ékasya_ádhi dhármaṇi /
énaś cakṛmā́ vayám /
yádekasyā́dhi dhármaṇi /
tásya_avayájanam asi /
yád ā́po ághniyā váruṇa_íti śápāmahe /
táto varuṇa no muñca //

2.6.6.3

ávabhṛtha nicaṅkuṇa nicerúr asi nicaṅkuṇa /
áva deváir devákṛtam éno 'yāṭ /
áva mártyair mártyakṛtam /
urór ā́ no deva riṣás pāhi /
sumitrā́ na ā́pa óṣadhayaḥ santu /
durmitrā́s tásmai bhuyāsuḥ /
yò 'smā́n dvéṣṭi /
yáṃ ca vayáṃ dviṣmáḥ /
drupadā́d iva_ín mumucānáḥ /
svinnáḥ srātvī́ málād iva //

2.6.6.4

pūtáṃ pavítreṇa_iva_ā́jyam /
ā́paḥ śundhantu mā_énasaḥ /
úd vayáṃ támasas pári /
páśyanto jyótir úttaram /
deváṃ devatrā́ sū́ryam /
áganma jyótir uttamám /
prátiyuto váruṇasya pā́śaḥ /
prátyasto váruṇasya pā́śaḥ /
édho 'sy edhiṣīmáhi /
samíd asi //

2.6.6.5

téjo 'si téjo máyi dhehi /
apó ánvacāriṣam /
rásena sámasṛkṣmahi /
páyasvām̐ agna ā́gamam /
táṃ mā sám̐sṛja várcasā /
prajáyā ca dhánena ca /
samā́vavarti pṛthivī́ /
sám uṣā́ḥ /
sám u sū́ryaḥ /
sám u víśvām idáṃ jágat /
vaiśvānarájyotir bhūyāsam /
vibhúṃ kā́maṃ vyàśnavai /
bhū́ḥ svā́hā //

Commentaries (4)

Linked texts (5)