Pramāṇa · Search · About · API

Taittiriyabrahmana 2.6.7

Taittirīyabrāhmaṇa 2.6.7

Language
Sanskrit

2.6.7.1

hótā yakṣat samídhā_índram iḍás padé /
nā́bhā pṛthivyā́ ádhi /
divó várṣmant sámidhyate /
ójiṣṭhaś carṣaṇīsáhān /
vétv ā́jyasya hótar yája /
hótā yakṣat tánūnápātam /
ūtíbhir, jétāram áparājitam /
índraṃ devám̐ suvarvídam /
pathíbhir mádhumattamaiḥ /
nárāśám̐sena téjasā //

2.6.7.2

vétv ā́jyasya hótar yája /
hótā yakṣad íḍābhir índram īḍitám /
ājúhvānam ámartyam /
devó deváiḥ sávīryaḥ /
vájrahastaḥ puraṃdaráḥ /
vétv ā́jyasya hótar yája /
hótā yakṣad barhíṣi_índraṃ niṣadvarám /
vṛṣabháṃ náryāpasam /
vásubhī rudráir ādityáiḥ /
sayúgbhir barhír ā́sadat //

2.6.7.3

vétv ā́jyasya hótar yája /
hótā yakṣad ójo ná vīryàm /
sáho, dvā́ra índram avardhayan /
suprāyaṇā́ víśrayantām ṛtāvṛ́dhaḥ /
dvā́ra índrāya mīḍhúṣe /
viyántv ā́jyasya hotar yája /
hótā yakṣad uṣé índrasya dhenū́ /
sudúghe mātárau mahī́ /
sávātarau ná téjasī /
vatsám índram avardhatām //

2.6.7.4

vītā́m ā́jyasya hótar yája /
hótā yakṣad dáivayā hótārā /
bhiṣájā sákhāyā /
havíṣā_índraṃ bhiṣajyataḥ, kavī́ deváu prácetasau /
índrāya dhatta indriyám /
vītā́m ā́jyasya hótar yája /
hótā yakṣat tisró devī́ḥ /
tráyas tridhā́tavo 'pásaḥ /
íḍā sárasvatī bhā́ratī //

2.6.7.5

mahī,_índrapatnīr havíṣmatīḥ /
viyántv ā́jyasya hótar yája /
hótā yakṣat tváṣṭāram índraṃ devám /
bhiṣájam̐ suyájaṃ ghṛ́taśríyam /
pururū́pam̐ surétasaṃ maghónim /
índrāya tváṣṭā dádhad indriyā́ṇi /
vétv ā́jyasya hótar yája /
hótā yakṣad vánaspátim śamitā́ram̐ śatákratum /
dhiyó joṣṭā́ram indriyám //

2.6.7.6

mádhvā samañján pathíbhiḥ sugébhiḥ /
svádāti havyáṃ mádhunā ghṛténa /
vétv ā́jyasya hótar yája /
hótā yakṣad índram̐ svā́hā_ā́jyasya /
svā́hā médasaḥ /
svā́hā stokā́nām /
svā́hā svā́hākṛtīnām /
svā́hā havyásūktīnām /
svā́hā devā́m̐ ājyapā́n /
svā́hā,_índram̐ hotrā́j juṣāṇā́ḥ /
índra_ā́jyasya viyantu /
hótar yája //

Commentaries (4)

Linked texts (4)