Pramāṇa · Search · About · API

Taittiriyabrahmana 2.6.8

Taittirīyabrāhmaṇa 2.6.8

Language
Sanskrit

2.6.8.1

sámiddha índra uṣásām ánīke /
purorúcā pūrvakṛ́d vāvṛdhānáḥ /
tribhír deváis trim̐śátā vájrabāhuḥ /
jaghā́na vṛtráṃ ví dúro vavāra /
nárāśám̐saḥ práti śū́ro mímānaḥ /
tanūnápāt práti yajñásya dhā́ma /
góbhir vapā́vān mádhunā samañján /
híraṇyaiś candrī́ yajati prácetāḥ /
īḍitó deváir hárivām̐ abhiṣṭíḥ /
ājúhvāno havíṣā śárdhamānaḥ //

2.6.8.2

puraṃdaró maghávān vájrabāhuḥ /
ā́yātu yajñám úpa no juṣāṇáḥ /
juṣāṇó barhír hárivān na índraḥ /
prācī́nam̐ sīdat pradíśā pṛthivyā́ḥ /
uruvyácāḥ práthamānam̐ syonám /
ādityáir aktáṃ vásubhiḥ sajóṣāḥ /
índraṃ dúraḥ kavaṣyò dhā́vamānāḥ /
vṛ́ṣāṇaṃ yantu jánayaḥ supátnīḥ /
dvā́ro devī́r abhíto víśrayantām /
suvī́rā vīráṃ práthamānā máhobhiḥ //

2.6.8.3

uṣā́sānáktā bṛhatī́ bṛhántam /
páyasvatī sudúghe śūram índram /
péśasvatī tántunā saṃvyáyantī /
devā́nāṃ deváṃ yajataḥ surukmé /
dáivyā mímānā mánasā purutrā́ /
hótārāv índraṃ prathamā́ suvā́cā /
mūrdhán yajñásya mádhunā dádhānā /
prācī́naṃ jyótir havíṣā vṛdhātaḥ /
tisró devī́r havíṣā várdhamānāḥ /
índraṃ juṣāṇā́ vṛ́ṣaṇaṃ ná pátnīḥ //

2.6.8.4

ácchinnaṃ tántuṃ páyasā sárasvatī /
íḍā devī́ bhā́ratī /
viśvátūrtiḥ /
tváṣṭā dádhad índrāya śúṣmam /
ápākó 'rciṣṭur yaśáse purū́ṇi /
vṛ́ṣā yájan vṛ́ṣaṇaṃ bhū́riretāḥ /
mūrdhán yajñásya sámanaktu devā́n /
vánaspátir ávasṛṣṭo ná pā́śaiḥ /
tmányā samañján_śamitā́ ná deváḥ /
índrasya havyáir jaṭháraṃ pṛṇānáḥ /
svádāti havyáṃ mádhunā ghṛténa /
stokā́nām índuṃ práti śū́ra índraḥ /
vṛṣāyámāṇo vṛṣabhás turāṣā́ṭ /
ghṛtaprúṣā mádhunā havyám undán /
mūrdhán yajñásya juṣatām̐ svā́hā //

Commentaries (4)

Linked texts (8)