Taittiriyabrahmana 2.7.11
Taittirīyabrāhmaṇa 2.7.11
- Language
- Sanskrit
2.7.11.1
agástyo marúdbhya ukṣṇáḥ práukṣat /
tā́n índra ā́datta /
tá enaṃ vájram udyátya_abhyā̀yanta /
tā́n agástyaś caivá_índraśca kayāśubhī́yena_aśamayatām /
tā́ṇ_śāntā́n úpāhvayata /
yát kayāśubhī́yaṃ bhávati śā́ntyai /
tásmād etá aindrā mārutā́ ukṣā́ṇaḥ savanī́yā bhavanti /
tráyaḥ prathamé 'hann ā́labhyante /
eváṃ dvitī́ye /
eváṃ tṛtī́ye //
2.7.11.2
eváṃ caturthé /
páñca_uttamé 'hann ā́labhyante /
várṣiṣṭham iva hy ètád áhaḥ /
várṣiṣṭhaḥ samānā́nāṃ bhavati /
yá eténa yájate /
yá u cainam eváṃ véda //
svā́rājyaṃ vā́ eṣá yajñáḥ /
eténa vā́ ékayā́vā kāndamáḥ svā́rājyam agacchat /
svā́rājyaṃ gacchati /
yá eténa yájate //
2.7.11.3
yá u cainam eváṃ véda //
mārutó vā́ eṣá stómaḥ /
eténa vái marúto devā́nāṃ bhū́yiṣṭhā abhavan /
bhū́yiṣṭhaḥ samānā́nāṃ bhavati /
yá eténa yájate /
yá u cainam eváṃ véda //
pañcaśāradī́yo vā́ eṣá yajñáḥ /
ā́ pañcamā́t púruṣād ánnam atti /
yá eténa yájate /
yá u cainam eváṃ véda //
saptadaśám̐ stómā ná_atiyanti /
saptadaśáḥ prajā́patiḥ /
prajā́pater evá ná_eti //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (5)
- Baudhāyanaśrautasūtra — Baudhāyana, Sanskrit
- Yajurbrāhmaṇa — Sanskrit
- Vedic Index of Names and Subjects — Arthur A. Macdonell & A. Berriedale Keith, English
- Original Sanskrit Texts on the Origin and History of the People of India, their Religion and Institutions — John Muir, English
- Śrautasūtra (Baudhāyana) — Baudhāyana, Sanskrit