Taittiriyabrahmana 2.7.12
Taittirīyabrāhmaṇa 2.7.12
- Language
- Sanskrit
2.7.12.1
asya_ájarāso damā́ marítrāḥ /
arcáddhūmāso agnáyaḥ pāvakā́ḥ /
śvicīcáyaḥ śvātrā́so bhuraṇyávaḥ /
vanarṣádo vāyávo ná sómāḥ //
yájā no mitrā́váruṇā /
yájā devā́m̐ ṛtáṃ bṛhát /
ágne yákṣi sváṃ dámam //
áśvinā píbatam̐ sutám /
dī́dyagnī śucivratā /
ṛtúnā yajñavāhasā //
2.7.12.2
dvé vírūpe carataḥ svárthe /
anyá_anyā vatsám úpadhāpayete /
hárir anyásyāṃ bhávati svadhā́vān /
śukró anyásyāṃ dadṛśe suvárcāḥ //
pūrvāparáṃ carato māyáyā_etáu /
śíśū krī́ḍantau páriyāto adhvarám /
víśvāny anyó bhúvanā_abhicáṣṭe /
ṛtū́n anyó vidádhaj jāyate púnaḥ //
trī́ṇi śatā́ trī́_ sahásrāṇy agním /
trim̐śát_ ca devā́ náva ca_asaparyan //
2.7.12.3
áukṣan ghṛtáir ā́stṛṇan barhír asmai /
ā́d íd dhótāraṃ nyàṣādayanta //
agnínā_agníḥ sámidhyate /
kavír gṛhápatir yúvā /
havyavā́ḍ juhvā̀syaḥ //
agnír devā́nāṃ jaṭháram /
pūtádakṣaḥ kavíkratuḥ /
devó devébhir ā́gamat //
agniśríyo marúto viśvákṛṣṭayaḥ /
ā́ tveṣám ugrám áva īmahe vayám //
2.7.12.4
té svāmíno rudríyā varṣánirṇijaḥ /
sim̐hā́ ná heṣákratavaḥ sudā́navaḥ //
yád uttamé maruto madhyamé vā /
yád vā_avamé subhagāso divíṣṭha /
táto no rudrā utá vā_anvásya /
ágne vittā́d dhavíṣo yád yájāmaḥ //
ī́ḍe agním̐ svávasaṃ námobhiḥ /
ihá prasaptó vícayat kṛtáṃ naḥ /
ráthair iva prábhare vājapádbhiḥ /
pradakṣiṇín marútām̐ stómam ṛdhyām //
2.7.12.5
śrudhí śrutkarṇa váhnibhiḥ /
deváir agne sayā́vabhiḥ /
ā́sīdantu barhíṣi /
mitró váruṇo aryamā́ /
prātaryā́vāṇo adhvarám //
víśveṣām áditir yajñíyānām /
víśveṣām átithir mā́nuṣāṇām /
agnír devā́nām áva āvṛṇānáḥ /
sumṛḍīkó bhavatu viśvávedāḥ //
tvé agne sumatíṃ bhíkṣamānāḥ //
2.7.12.6
diví śrávo dadhire yajñíyāsaḥ /
náktā ca cakrúr uṣásā vírūpe /
kṛṣṇáṃ ca várṇam aruṇáṃ ca sáṃdhuḥ //
tvā́m agna ādityā́sa āsyàm /
tvā́ṃ jihvā́m̐ śúcayaś cakrire kave /
tvā́m̐ rātiṣā́co adhvaréṣu saścire /
tvé devā́ havír adanty ā́hutam //
ní tvā yajñásya sā́dhanam /
ágne hótāram ṛtvíjam /
vanuṣvád deva dhīmahi prácetasam /
jīráṃ dūtám ámartyam //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (6)
- Mādhyandina (ed. Shuklayajurveda) — Sanskrit
- A Vedic Concordance — Maurice Bloomfield, English
- Yajurbrāhmaṇa — Sanskrit
- Kāṇvaśākhā — Sanskrit
- Die Kosmographie der Inder nach den Quellen dargestellt — Willibald Kirfel, German
- Yajussaṃhitā — Sanskrit