Pramāṇa · Search · About · API

Taittiriyabrahmana 2.7.13

Taittirīyabrāhmaṇa 2.7.13

Language
Sanskrit

2.7.13.1

tíṣṭhā hárī rátha ā́ yujyámānā yāhí /
vāyúr ná niyúto no áccha /
píbāsy ándho abhísṛṣṭo asme /
índra svā́hā rarimā́ te mádāya //
kásya vṛ́ṣā suté sácā /
niyútvān vṛṣabhó raṇat /
vṛtrahā́ sómapītaye //
índraṃ vayáṃ mahādhané /
índram árbhe havāmahe /
yújaṃ vṛtréṣu vajríṇam //

2.7.13.2

dvitā́ yó vṛtrahántamaḥ /
vidá índraḥ śatákratuḥ /
úpa no háribhiḥ sutám //
sá sū́ra ā́ janáyañ jyótir índram /
ayā́ dhiyā́ taráṇir ádribarhāḥ /
ṛténa śuṣmī́n ávamāno arkáiḥ /
vyùsrídho asró ádrir bibheda //
utá tyád āśváśviyam /
yád indra nā́huṣīṣv ā́ /
ágre vikṣú prátīdayat //

2.7.13.3

bháreṣv índram̐ suhávam̐ havāmahe /
am̐homúcam̐ sukṛ́taṃ dáivyaṃ jánam /
agníṃ mitráṃ váruṇam̐ sātáye bhágam /
dyā́vāpṛthivī́ marútaḥ svastaye //
mahí kṣétraṃ purúś candráṃ vívidvā́n /
ā́dít sákhibhyaś ca rátham̐ sámairat /
índro nṛ́bhir ajanad dī́dyānaḥ sākám /
sū́ryam uṣásaṃ gātúm agním //
urúṃ no lokám ánuneṣi vidvā́n /
súvarvaj jyótir ábhayam̐ svastí //

2.7.13.4

ṛṣvā́ ta indra sthávirasya bāhū́ /
úpastheyāma śaraṇā́ bṛhántā //
ā́ no víśvābhir ūtíbhiḥ sajóṣāḥ /
bráhma juṣāṇó haryaśva yāhi /
várīvṛjat sthávirebhiḥ suśipra /
asmé dádhad vṛ́ṣaṇam̐ śúṣmam indra //
índrāya gā́va āśíram /
duduhré vajríṇe mádhu /
yát sīm upahvaré 'vidát //
tā́s te vajrin dhenávo jojayur naḥ //

2.7.13.5

gábhastayo niyúto viśvávārāḥ /
áhar_ahar bhū́ya íj jóguvānāḥ /
pūrṇā́ indra kṣumáto bhójanasya //
imā́ṃ te dhíyaṃ prábhare mahó mahī́m /
asyá stotré dhiṣáṇā yát ta ānajé /
tám utsavé ca prasavé ca sāsahím /
índraṃ devā́saḥ śávasā madann ánu //

Commentaries (4)

Linked texts (4)