Taittiriyabrahmana 2.7.14
Taittirīyabrāhmaṇa 2.7.14
- Language
- Sanskrit
2.7.14.1
prajā́patiḥ paśū́n asṛjata /
tè 'smāt sṛṣṭā́ḥ párāñca āyan /
tā́n agniṣṭoména ná_āpnot /
tā́n ukthyèna ná_āpnot /
tā́n ṣoḍaśínā ná_āpnot /
tā́n rā́triyā ná_āpnot /
tā́nt saṃdhínā ná_āpnot /
sò 'gním abravīt /
imā́n ma īpsa_íti /
tā́n agnís trivṛ́tā stómena ná_āpnot //
2.7.14.2
sá índram abravīt /
imā́n ma īpsa_íti /
tā́n índraḥ pañcadaśéna stómena ná_āpnot /
sá víśvān devā́n abravīt /
imā́n ma īpsata_íti /
tā́n víśve devā́ḥ saptadaśéna stómena ná_āpnuvan /
sá víṣṇum abravīt /
imā́n ma īpsa_íti /
tā́n víṣṇur ekavim̐śéna stómena_āpnot /
vāravantī́yena_avārayata //
2.7.14.3
idáṃ víṣṇur vícakrama íti vyàkramata //
yásmāt paśávaḥ prá prá_iva bhrám̐śeran /
sá eténa yajeta //
yád ā́pnot /
tád aptóryā́masya_āptoryāmatvám /
eténa vái devā́ jáitvāni jitvā́ /
yáṃ kā́mam ákāmayanta tám āpnuvan /
yáṃ kā́maṃ kāmáyate /
tám eténa_āpnoti //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (4)
- Pañcaviṃśabrāhmaṇa — Sanskrit
- Sāmavedabrāhmaṇānyaṣṭau — Sanskrit
- A Vedic Concordance — Maurice Bloomfield, English
- Yajurbrāhmaṇa — Sanskrit