Pramāṇa · Search · About · API

Taittiriyabrahmana 2.7.15

Taittirīyabrāhmaṇa 2.7.15

Language
Sanskrit

2.7.15.1

vyāghrò 'yám agnáu carati práviṣṭaḥ /
ṛ́ṣīṇāṃ putró abhiśastipā́ ayám /
namaskāréṇa /
námasā te juhomi /
mā́ devā́nāṃ mithuyā́ karma bhāgám //
sā́vīrhí deva prasavā́ya pitre /
varṣmā́ṇam asmai varimā́ṇam asmai /
átha_asmábhyam̐ savitaḥ sarvátātā /
divé díva ā́suvā bhū́ripaśváḥ //
bhūtó bhutéṣu carati práviṣṭaḥ /
sá bhūtā́nām ádhipatir babhūva //

2.7.15.2

tásya mṛtyáu carati rājasū́yam /
sá rā́jā rājyám anumanyatām idám //
yébhiś śílpaiḥ paprathānā́m ádṛm̐hat /
yébhir dyā́m abhyápim̐śat prajā́patiḥ /
yébhir vā́caṃ viśvárūpām̐ samávyayat /
téna_imám agna ihá várcasā sámaṅgdhi //
yébhir ādityás tápati práketúbhiḥ /
yébhiḥ sū́ryo dadṛśé citrábhānuḥ /
yébhir vā́caṃ puṣkalébhir ávyayat /
téna_imám agna ihá várcasā sámaṅgdhi //

2.7.15.3

ā́_ayáṃ bhātu śávasā páñca kṛṣṭī́ḥ /
índra iva jyeṣṭhó bhavatu prajā́vān /
asmā́ astu puṣkaláṃ citrábhānu /
ā́_ayáṃ pṛṇaktu rájasī upástham //
yát te śílpaṃ kaśyapa rocanā́vat /
indriyā́vat puṣkaláṃ citrábhānu /
yásmint sū́ryā árpitāḥ saptá sākám /
tásmin rā́jānam ádhivíśraya_imám //
dyáur asi pṛthivy àsi //
vyāghró váiyāghré 'dhi //

2.7.15.4

víśrayasva díśo mahī́ḥ /
víśas tvā sárvā vāñchantu /
mā́ tvád rāṣṭrám ádhibhraśat //
yā́ divyā́ ā́paḥ páyasā saṃbabhūvúḥ /
yā́ antárikṣa utá pā́rthivīr yā́ḥ /
tā́sāṃ tvā sárvāsām̐ rucā́ /
abhíṣiñcāmi várcasā /
abhí tvā várcasā sicaṃ divyéna /
páyasā sahá /
yáthā_āsā rāṣṭravárdhanaḥ //

2.7.15.5

táthā tvā savitā́ karat /
índraṃ víśvā avīvṛdhan /
samudrávyacasaṃ gíraḥ /
rathī́tamam̐ rathīnā́m /
vā́jānām̐ sátpatiṃ pátim /
vásavas tvā purástād abhíṣiñcantu gāyatréṇa chándasā /
rudrā́s tvā dakṣiṇatò 'bhíṣiñcantu tráiṣṭubhena chándasā /
ādityā́s tvā paścā́d abhíṣiñcantu jā́gatena chándasā /
víśve tvā devā́ uttaratò 'bhíṣiñcantv ā́nuṣṭubhena chándasā /
bṛ́haspátis tvā_upáriṣṭād abhíṣiñcatu pā́ṅktena chándasā //

2.7.15.6

aruṇáṃ tvā vṛ́kam ugráṃ khajaṃkarám /
rócamānaṃ marútām ágre arcíṣaḥ /
sū́ryavantaṃ maghávānaṃ viṣāsahím /
índram ukthyéṣu nāmahū́tamam̐ huvema //
prá bāhávā sisṛtaṃ jīváse naḥ /
ā́ no gávyūtim ukṣataṃ ghṛténa /
ā́ no jáne śravayataṃ yuvānā /
śrutáṃ me mitrāvaruṇā havemā́ //
índrasya te vīryakṛ́taḥ /
bāhū́ upā́vaharāmi //

Commentaries (4)

Linked texts (10)