Pramāṇa · Search · About · API

Taittiriyabrahmana 2.7.18

Taittirīyabrāhmaṇa 2.7.18

Language
Sanskrit

2.7.18.1

índraṃ vái svā́ víśo marúto ná_apācāyan /
só 'napacāyyamāna etáṃ vighanám apaśyat /
tám āharat /
téna_ayajata /
téna_evá_āsāṃ tám̐ sám̐stambháṃ vyàhan /
yád vyáhan /
tád vighanásya vighanatvám //
ví pāpmā́naṃ bhrā́tṛvyam̐ hate /
yá eténa yájate /
yá u cainam eváṃ véda //

2.7.18.2

yám̐ rā́jānaṃ víśo ná_apacā́yeyuḥ /
yó vā brāhmaṇás támasā pāpmánā prā́vṛtaḥ syā́t /
sá eténa yajeta /
vighanéna_eváinad vihátya /
viśā́m ā́dhipatyaṃ gacchati //
tásya dvé dvādaśe stotré bhávataḥ /
dvé caturvim̐śé /
áudbhidyam evá tát /
etád vái kṣatrásya_áudbhidyam /
yád asmai svā́ víśo balím̐ háranti //

2.7.18.3

háranty asmai víśo balím /
ā́_énam ápratikhyātaṃ gacchati /
yá eváṃ véda //
prabā́hug vā́ ágre kṣatrā́ṇy ā́tepuḥ /
téṣām índraḥ kṣatrā́ṇy ā́datta /
ná vā́ imā́ni kṣatrā́ṇy abhūvann íti /
tán nákṣatrāṇāṃ nakṣatratvám /
ā́ śréyaso bhrā́tṛvyasya téja indriyáṃ datte /
yá eténa yájate /
yá u cainam eváṃ véda //

2.7.18.4

tád yáthā ha vái sacākríṇau káplakāv upā́vahitau syā́tām /
evám etáu yugmántau stómau /
ayúkṣu stómeṣu kriyete /
pāpmánó 'pahatyai //
ápa pāpmā́naṃ bhrā́tṛvyam̐ hate /
yá eténa yájate /
yá u cainam eváṃ véda //
tád yáthā ha vái sūtagrāmaṇyàḥ /
eváṃ chándām̐si /
téṣv asā́v ādityó bṛhatī́r abhyū̀ḍhaḥ //

2.7.18.5

satóbṛhatīṣu stuvate sató bṛhan /
prajáyā paśúbhir asāni_íty evá //
vyátiṣaktābhiḥ stuvate /
vyátiṣaktaṃ vái kṣatráṃ viśā́ /
viśā́_eváinaṃ kṣatréṇa vyátiṣajati //
vyátiṣaktābhiḥ stuvate /
vyátiṣakto vái grāmaṇīḥ sajātáiḥ /
sajātáir eváinaṃ vyátiṣajati //
vyátiṣaktābhiḥ stuvate /
vyátiṣakto vái púruṣaḥ pāpmábhiḥ /
vyátiṣaktābhir evā́sya pāpmáno nudate //

Commentaries (4)

Linked texts (6)