Pramāṇa · Search · About · API

Taittiriyabrahmana 2.7.7

Taittirīyabrāhmaṇa 2.7.7

Language
Sanskrit

2.7.7.1

sim̐hé vyāghrá utá yā́ pṛ́dākau /
tvíṣir agnáu brāhmaṇé sū́rye yā́ /
índraṃ yā́ devī́ subhágā jajā́na /
sā́ na ā́gan várcasā saṃvidānā́ //
yā́ rājanyè dundubhā́v ā́yatāyām /
áśvasya krandye púruṣasya māyáu /
índraṃ yā́ devī́ subhágā jajā́na /
sā́ na ā́gan várcasā saṃvidānā́ //
yā́ hastíni dvipíni yā́ híraṇye /
tvíṣir áśveṣu púruṣeṣu góṣu //

2.7.7.2

índraṃ yā́ devī́ subhágā jajā́na /
sā́ na ā́gan várcasā saṃvidānā́ //
ráthe akṣéṣu vṛṣabhásya vā́je /
vā́te parjánye váruṇasya śuṣme /
índraṃ yā́ devī́ subhágā jajā́na /
sā́ na ā́gan várcasā saṃvidānā́ //
rā́ḍ asi virā́ḍ asi /
samrā́ḍ asi svarā́ḍ asi //
índrāya tvā téjasvate téjasvantam̐ śrīṇāmi /
índrāya tvā_ójasvata ójasavantam̐ śrīṇāmi //

2.7.7.3

índrāya tvā páyasvate páyasvantam̐ śrīṇāmi /
índrāya tvā_ā́yuṣmata ā́yuṣmantam̐ śrīṇāmi //
téjo 'si /
tát te práyacchāmi /
téjasvad astu me múkham /
téjasvat_śíro astu me /
téjasvān viśvátaḥ pratyáṅ /
téjasā sáṃpipṛgdhi mā //
ójo 'si /
tát te práyacchāmi //

2.7.7.4

ójasvad astu me múkham /
ójasvat_śíro astu me /
ójasvān viśvátaḥ pratyáṅ /
ójasā sáṃpipṛgdhi mā //
páyo 'si /
tát te práyacchāmi /
páyasvad astu me múkham /
páyasvat_śíro astu me /
páyasvān viśvátaḥ pratyáṅ /
páyasā sáṃpipṛgdhi mā //

2.7.7.5

ā́yur asi /
tát te práyacchāmi /
ā́yuṣmad astu me múkham /
ā́yuṣmat_śíro astu me ā́yuṣmān viśvátaḥ pratyáṅ /
ā́yuṣā sáṃpipṛgdhi mā //
imám agna ā́yuṣe várcase kṛdhi /
priyám̐ réto varuṇa soma rājan /
mātā́_iva_asmā adite śárma yaccha /
víśve devā járadaṣṭir yáthā́ sat //

2.7.7.6

ā́yur asi viśvā́yur asi /
sarvā́yur asi sárvam ā́yur asi //
yáto vā́to mánojavāḥ /
yátaḥ kṣáranti síndhavaḥ /
tā́sāṃ tvā sárvāsām̐ rucā /
abhíṣiñcāmi várcasā //
samudrá iva_asi gahmánā /
sóma iva_asy ádābhyaḥ /
agnír iva viśvátaḥ pratyáṅ /
sū́rya iva jyótiṣā vibhū́ḥ //

2.7.7.7

apā́ṃ yó drávaṇe rásaḥ /
tám ahám asmā́ āmuṣyāyaṇā́ya /
téjase brahmavarcasā́ya gṛhṇāmi /
apā́ṃ yá ūrmáu rásaḥ /
tám ahám asmā́ āmuṣyāyaṇā́ya /
ójase vīryā̀ya gṛhṇāmi /
apā́ṃ yó madhyató rásaḥ /
tám ahám asmā́ āmuṣyāyaṇā́ya /
púṣṭyai prajánanāya gṛhṇāmi /
apā́ṃ yó yajñíyo rásaḥ /
tám ahám asmā́ āmuṣyāyaṇā́ya /
ā́yuṣe dīrghāyutvā́ya gṛhṇāmi //

Commentaries (4)

Linked texts (7)