Taittiriyabrahmana 2.7.8
Taittirīyabrāhmaṇa 2.7.8
- Language
- Sanskrit
2.7.8.1
abhípréhi vīráyasva /
ugráś céttā sapatnahā́ /
ā́tiṣṭha mitravárdhanaḥ /
túbhyaṃ devā́ ádhibruvan //
aṅkáu nyaṅkā́v abhíta ā́tiṣṭha vṛtrahan rátham /
ātíṣṭhantaṃ pári víśve abhūṣan /
śríyaṃ vásānaś carati svárocāḥ /
mahát tád asyá_asurasya nā́ma /
ā́ viśvárūpo amṛ́tāni tasthau //
ánu tvā_índro madatv ánu bṛ́haspátiḥ /
2.7.8.2
ánu sómo ánv agnír āvīt /
ánu tvā víśve devā́ avantu /
ánu saptá rā́jāno yá uta_abhíṣiktāḥ //
ánu tvā mitrā́varuṇāv ihá_avatam /
ánu dyā́vāpṛthivī́ viśváśaṃbhū /
sū́ryo áhobhir ánu tvā_avatu /
candrámā nákṣatrair ánu tvā_avatu //
dyáuś ca tvā pṛthivī́ ca prácetasā /
śukró bṛhád dákṣinā tvā pipartu /
ánu svadhā́ cikitām̐ sómo agníḥ /
ā́_ayáṃ pṛṇaktu rájasī upástham //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (5)
- Paippalādasaṃhitā — Sanskrit
- A Vedic Concordance — Maurice Bloomfield, English
- Yajurbrāhmaṇa — Sanskrit
- Vedic Index of Names and Subjects — Arthur A. Macdonell & A. Berriedale Keith, English
- Altindische Grammatik — Jacob Wackernagel & Albert Debrunner, German