Pramāṇa · Search · About · API

Taittiriyabrahmana 2.7.9

Taittirīyabrāhmaṇa 2.7.9

Language
Sanskrit

2.7.9.1

prajā́patiḥ prajā́ asṛjata /
tā́ asmāt sṛṣṭā́ḥ párācīr āyan /
sá etáṃ prajā́patir odanám apaśyat /
só 'nnaṃ bhūtò 'tiṣṭhat /
tā́ anyátra_annā́dyam ávittvā /
prajā́patiṃ prajā́ upā́vartanta /
ánnam eváinaṃ bhūtáṃ paśyantīḥ prajā́ upā́vartante /
yá eténa yájate /
yá u cainam eváṃ véda /
sárvāṇy ánnāni bhavanti //

2.7.9.2

sárve púruṣāḥ /
sárvāṇy evá_annāny ávarundhe /
sárvān púruṣān //
rā́ḍ asi virā́ḍ asi_íty āha /
svā́rājyam eváinaṃ gamayati //
yád dhíraṇyaṃ dádāti /
téjas téna_ávarundhe /
yát tisṛdhanvám /
vīryàṃ téna /
yád áṣṭrām //

2.7.9.3

púṣṭiṃ téna /
yát kamaṇḍálum /
ā́yuṣṭéna //
yád dhíraṇyam ābadhnā́ti /
jyótir vái híraṇyam /
jyótir evā́smin dadhāti /
átho téjo vái híraṇyam /
téja evá_ātmán dhatte //
yád odanáṃ prāśnā́ti /
etád evá sárvam avarúdhya //

2.7.9.4

tád asminn ekadhā́_adhāt //
rohiṇyā́ṃ kāryàḥ /
yád brāhmaṇá evá rohiṇī́ /
tásmād evá /
átho várṣma_eváinam̐ samānā́nāṃ karoti //
udyatā́ sū́ryeṇa kāryàḥ /
udyántaṃ vā́ etám̐ sárvāḥ prajā́ḥ prátinandanti //
didṛkṣéṇyo darśanī́yo bhavati /
yá eváṃ véda //
brahmavādíno vadanti //

2.7.9.5

avétyo 'vabhṛthā́3 nā́3 íti /
yád darbhapuñjīláiḥ paváyati /
tát svid evá_avaiti /
tán ná_avaiti //
tribhíḥ pavayati /
tráya imé lokā́ḥ /
ebhír eváinaṃ lokáiḥ pavayati /
átho apā́ṃ vā́ etát téjo várcaḥ /
yád darbhā́ḥ /
yád darbhapuñjīláiḥ paváyati /
apā́m eváinaṃ téjasā várcasā_abhíṣiñcati //

Commentaries (4)

Linked texts (5)