Pramāṇa · Search · About · API

Taittiriyabrahmana 3.12.3

Taittirīyabrāhmaṇa 3.12.3

Language
Sanskrit

3.12.3.1

tápasā devā́ devátām ágra āyan /
tápasā_ṛ́ṣayaḥ svàr ánvavindan /
tápasā sapátnān práṇudāmā́rātīḥ /
yénedáṃ víśvaṃ páribhūtaṃ yád ásti //
prathamajáṃ devám̐ havíṣā vidhema /
svayaṃbhú bráhma paramáṃ tápo yát /
sá evá putráḥ sá pitā́ sá mātā́ /
tápo ha yakṣáṃ prathamáṃ sáṃbabhūva //
śraddháyā́_ā́ devo devatvám aśnute /
śraddhā́ pratiṣṭhā́ lokásya devī́ /

3.12.3.2

sā́ no juṣāṇā́_úpayajñám ā́gāt /
kā́mavatsā_amṛ́taṃ dúhānā //
śraddhā́ devī́ prathamajā́ ṛtásya /
víśvasya bhartrī́ jágataḥ pratiṣṭhā́ /
tā́m̐ śraddhā́m̐ havíṣā yajāmahe /
sā́ no lokám amṛ́taṃ dadhātu /
ī́śānā devī́ bhúvanasyā́dhipatnī /
ā́gāt satyám̐ havír idáṃ juṣāṇám /
yásmād devā́ jajñire bhúvanaṃ ca víśve /
tásmai vidhema havíṣā ghṛténa /

3.12.3.3

yáthā deváiḥ sadhamā́daṃ madema //
yásya pratiṣṭhā́_urv àntárikṣam /
yásmād devā́ jajñire bhúvanaṃ ca sárve /
tát satyám árcad úpa yajñáṃ na ā́gāt /
bráhma_ā́hutīr úpa módamānam //
mánaso váśe sárvam idáṃ babhūva /
nā́nyásya máno váśam ánviyāya /
bhīṣmó hí deváḥ sáhasaḥ sáhīyān /
sá no juṣāṇá úpa yajñám ā́gāt //
ā́kūtīnām ádhipatiṃ cétasāṃ ca /

3.12.3.4

saṃkalpájūtiṃ deváṃ vipaścím /
máno rā́jānam ihá vardháyantaḥ /
upahavè 'sya sumatáu syāma //
cáraṇaṃ pavítraṃ vítataṃ purāṇám /
yéna pūtás tárati duṣkṛtā́ni /
téna pavítreṇa śuddhéna pūtā́ḥ /
áti pāpmā́nam árātiṃ tarema //
lokásya dvā́ram arcimát pavítram /
jyótiṣmad bhrā́jamānaṃ máhasvat /
amṛ́tasya dhā́rā bahudhā́ dóhamānam /
cáraṇaṃ no loké súdhitāṃ dadhātu //
agnír mūrdhā́ bhúvaḥ /
ánu no 'dyā́numatir ánv íd anumate tvám //
havyavā́ham̐, svìṣṭam //

Commentaries (4)

Linked texts (10)