Pramāṇa · Search · About · API

Taittiriyabrahmana 3.12.5

Taittirīyabrāhmaṇa 3.12.5

Language
Sanskrit

3.12.5.1

bráhma vái cáturhotāraḥ /
cáturhotṛbhyó 'dhi yajñó nírmitaḥ /
ná_enam̐ śaptám /
nā́bhícaritam ā́gacchati /
yá eváṃ véda //
yó ha vái cáturhotṛṇāṃ caturhotṛtváṃ véda /
átho páñcahotṛtvam /
sárvā hāsmai díśaḥ kalpante /
vācáspátir hótā dáśahotṝṇām /
pṛthivī́ hótā cáturhotṝṇām /

3.12.5.2

agnír hótā páñcahotṝṇām /
vā́g ghótā ṣáḍḍhotṝṇām /
mahā́havir hótā saptáhotṝṇām /
etád vái cáturhotṛṇāṃ caturhotṛtvám /
átho páñcahotṛtvam /
sárvā hāsmai díśaḥ kalpante /
yá eváṃ véda //
eṣā́ vái sarvavidyā́ /
etád bheṣajám /
eṣā́ paṅktíḥ svargásya lokásyāñjasā́_ayaniḥ srutíḥ /

3.12.5.3

etā́n yó 'dhyáity ácchadir darśé yā́vat tarásam /
svàr eti /
anapabraváḥ sárvam ā́yur eti /
vindáte prajā́m /
rāyáspóṣaṃ gaupatyám /
brahmavarcasī́ bhavati //
etā́n yó 'dhyáiti /
spṛṇóty ātmā́nam /
prajā́ṃ pitṛ́̄n //
etā́n vā́ aruṇá aupaveśír vidā́ñcakāra /

3.12.5.4

etáir adhivādám ápājayat /
átho víśvaṃ pāpmā́nam /
svàr yayau /
etā́n yó 'dhyáiti /
adhivādáṃ jayati /
átho víśvaṃ pāpmā́nam /
svàr eti //
etáir agníṃ cinvīta svargákāmaḥ /
etáir ā́yuṣkāmaḥ /
prajā́paśúkāmo vā //

3.12.5.5

purástād dáśahotāram údañcam úpadadhāti yāvatpadám /
hṛ́dayaṃ yájuṣī pátnyau ca /
dakṣiṇatáḥ prā́ñcaṃ cáturhotāram /
paścā́d údañcaṃ páñcahotāram /
uttaratáḥ prā́ñcam̐ ṣáḍḍhotāram /
upáriṣṭāt prā́ñcam̐ saptáhotāram /
hṛ́dayaṃ yájūm̐ṣi pátnyaś ca /
yathāvakāśáṃ gráhān /
yathāvakāśáṃ pratigrahā́n_lokaṃpṛṇā́ś ca /
sárvā hāsya_etā́ devátāḥ prītā́ abhī́ṣṭā bhavanti /

3.12.5.6

sádevam agníṃ cinute //
rathásaṃmitaś cetavyàḥ /
vájro vái ráthaḥ /
vájreṇa_evá pāpmā́naṃ bhrā́tṛvyam̐ stṛṇute /
pakṣáḥsaṃmitaś cetavyàḥ /
etā́vān vái ráthaḥ /
yā́vat pakṣáḥ /
rathásaṃmitam evá cinute //
imám evá lokáṃ paśubandhénābhíjayati /
átho agniṣṭoména /

3.12.5.7

antárikṣam ukthyèna /
svàr atirātréṇa /
sárvān_lokā́n ahīnéna /
átho satréṇa //
váro dákṣiṇā /
váreṇa_evá váram̐ spṛṇoti /
ātmā́ hí váraḥ //
ékavim̐śatir dákṣiṇā dadāti /
ekavim̐śó vā́ itáḥ svargó lokáḥ /
prá svargáṃ lokám āpnoti /

3.12.5.8

asā́v ādityá ekavim̐śáḥ /
amúm evá_ādityám āpnoti //
śatáṃ dadāti /
śatā́yuḥ púruṣaḥ śaténdriyaḥ /
ā́yuṣy evá_indriyé prátitiṣṭhati //
sahásraṃ dadāti /
sahásrasaṃmitaḥ svargó lokáḥ /
svargásya lokásyābhíjityai //
anviṣṭakáṃ dákṣiṇā dadāti /
sárvāṇi váyām̐si /

3.12.5.9

sárvasya_ā́ptyai /
sárvasyā́varuddhyai //
yádi ná vindéta /
manthā́n etāvató dadyād odanā́n vā /
aśnuté táṃ kā́mam /
yásmai kā́māyāgníś cīyáte //
paṣṭhauhī́ṃ tv antárvatīṃ dadyāt /
sā́ hí sárvāṇi váyām̐si /
sárvasya_ā́ptyai /
sárvasyā́varuddhyai //

3.12.5.10

híraṇyaṃ dadāti /
híraṇyajyotir evá svargáṃ lokám eti //
vā́so dadāti /
téna_ā́yuḥ prátirate //
veditṛtīyé yajeta /
tríṣatyā hí devā́ḥ /
sásatyam agníṃ cinute //
tád etát paśubandhé brā́hmaṇaṃ brūyāt /
ná_itareṣu yajñéṣu //
yó ha vái cáturhotṝn anusavanáṃ tarpayitavyā̀n véda /

3.12.5.11

tṛ́pyati prajáyā paśúbhiḥ /
úpa_enam̐ somapīthó namati /
eté vái cáturhotāro 'nusavanáṃ tarpayitavyā̀ḥ /
yé brāhmaṇā́ bahuvídaḥ /
tébhyo yád dákṣiṇā ná náyet /
dúriṣṭam̐ syāt /
agním asya vṛñjīran /
tébhyo yathāśraddháṃ dadyāt /
svìṣṭam evá_etát kriyate /
nā́syāgníṃ vṛñjate //

3.12.5.12

hiraṇya_iṣṭakó bhavati /
yā́vad uttamám aṅgulikāṇḍaṃ yajñaparúṣā sáṃmitam /
téjo híraṇyam //
yádi híraṇyaṃ ná vindét /
śárkarā aktā́ úpadadhyāt /
téjo ghṛtám /
sátejasam evā́gníṃ cinute //
agníṃ citvā́ sautrāmaṇyā́ yajeta maitrāvaruṇyā́ vā /
vīryèṇa vā́ eṣá vyṛ̀dhyate /
yò 'gníṃ cinuté /

3.12.5.13

yā́vad evá vīryàm /
tád asmin dadhāti //
bráhmaṇaḥ sā́yujyam̐ salokátām āpnoti /
etā́sām evá devátānām̐ sā́yujyam /
sārṣṭítām̐ samānalokátām āpnoti /
yá etám agníṃ cinuté /
yá u ca_enam eváṃ véda //
etád evá sāvitré brā́hmaṇam /
átho nāciketé //

Commentaries (4)

Linked texts (4)