Pramāṇa · Search · About · API

Taittiriyabrahmana 3.12.7

Taittirīyabrāhmaṇa 3.12.7

Language
Sanskrit

3.12.7.1

sárvā díśo dikṣú /
yác cāntár bhūtáṃ prátiṣṭhitam /
sárvās tā́ íṣṭakāḥ kṛtvā́ /
úpa kāmadúghā dadhe /
téna_ ṛ́ṣiṇā téna bráhmaṇā /
táyā devátayāṅgirasvád dhruvā́ sīda //
antárikṣaṃ ca kévalam /
yác cāsmínn antarā́hitam /
sárvās tā́ḥ //
āntarikṣyàś ca yā́ḥ prajā́ḥ /

3.12.7.2

gandharvāpsarásaś ca yé /
sárvās tā́ḥ //
sárvān udārā́nt salílān /
antárikṣe prátiṣṭhitān /
sárvās tā́ḥ //
sárvān udārā́nt salilā́n /
sthāvarā́ḥ proṣyā̀ś ca yé /
sárvās tā́ḥ //
sárvāṃ dhúnim̐ sárvān dhvam̐sā́n /
himó yác ca śīyáte /

3.12.7.3

sárvās tā́ḥ //
sárvān márīcīn vítatān /
nīhāró yác ca śīyáte /
sárvās tā́ḥ //
sárvā vidyútaḥ sárvānt stanayitnū́n /
hrādúnīr yác ca śīyáte /
sárvās tā́ḥ //
sárvāḥ srávantīḥ sarítaḥ /
sárvam apsucaráṃ ca yát /
sárvās tā́ḥ //

3.12.7.4

yā́ś ca kū́pyā yā́ś ca nādyā̀ḥ samudríyāḥ /
yā́ś ca vaiśantī́r utá prāsacī́ryā́ḥ /
sárvās tā́ḥ //
yé ca_uttíṣṭhanti jīmū́tāḥ /
yā́ś ca várṣanti vṛṣṭáyaḥ /
sárvās tā́ḥ //
tápas téja ākāśáṃ /
yác ca_ākāśé prátiṣṭhitam /
sárvās tā́ḥ //
vāyúṃ váyām̐si sárvāṇi /

3.12.7.5

antarikṣacaráṃ ca yát /
sárvās tā́ḥ //
agním̐ sū́ryaṃ candrám /
mitráṃ váruṇaṃ bhágam /
sárvās tā́ḥ //
satyám̐ śraddhā́m̐ tápo dámam /
nā́ma rū́paṃ ca bhūtā́nām /
sárvās tā íṣṭakāḥ kṛtvā́ úpa kāmadúghā dadhe /
téna_ ṛ́ṣiṇā téna bráhmaṇā /
táyā devátayāṅgirasvád dhruvā́ sīda //

Commentaries (4)

Linked texts (7)