Pramāṇa · Search · About · API

Taittiriyabrahmana 3.12.9

Taittirīyabrāhmaṇa 3.12.9

Language
Sanskrit

3.12.9.1

ṛcā́ṃ prā́cī mahatī́ díg ucyate /
dákṣiṇām āhur yájuṣām apārā́m /
átharvaṇām áṅgirasāṃ pratī́cī /
sā́mnām údīcī mahatī́ díg ucyate //
ṛgbhíḥ pūrvāhṇé diví devá īyate /
yajurvedé tiṣṭhati /
mádhye áhnaḥ /
sāmavedénāstamayé máhīyate /
védair áśūnyas tribhír eti sū́ryaḥ //
ṛgbhyó jātā́m̐ sarvaśó mū́rtim āhuḥ /
sárvā gátir yājuṣī́ ha_evá śáśvat //

3.12.9.2

sárvaṃ téjaḥ sāmarūpyám̐ ha śáśvat /
sárvam̐ ha_idáṃ bráhmaṇā ha_evá sṛṣṭám //
ṛgbhyó jātáṃ váiśyaṃ várṇam āhuḥ /
yajurvedáṃ kṣatriyásya_āhur yónim /
sāmavedó brāhmaṇā́nāṃ prásūtiḥ /
pū́rve pū́rvebhyo váca etád ūcuḥ //
ādarśám agníṃ cinvānā́ḥ /
pū́rve viśvasṛ́jo 'mṛ́tāḥ /
śatáṃ varṣasahasrā́ṇi /
dīkṣitā́ḥ sattrám āsata //

3.12.9.3

tápa āsīd gṛhápatiḥ /
bráhma brahmā́bhavat svayám /
satyám̐ ha hótā_eṣām ā́sīt /
yád viśvasṛja ā́sata //
amṛ́tam ebhya údagāyat /
sahásraṃ parivatsarā́n /
bhūtám̐ ha prastotā́_eṣām ā́sīt /
bhaviṣyát práti cāharat //
prāṇó adhvaryúr abhavat /
idám̐ sárvam̐ síṣāsatām /

3.12.9.4

apānó vidvā́n āvṛ́taḥ /
práti prā́tiṣṭhad adhvaré //
ārtavā́ upagātā́raḥ /
sadasyā̀ ṛtávo 'bhavan /
ardhamāsā́ś ca mā́sāś ca /
camasādhvaryavó 'bhavan //
áśam̐sad bráhmaṇas téjaḥ /
acchāvākó 'bhavad yáśaḥ /
ṛtám eṣāṃ praśāstā́_āsīt /
yád viśvasṛ́ja ā́sata //

3.12.9.5

ū́rg rā́jānam údavahat /
dhruvagopáḥ sáho 'bhavat /
ójo 'bhyàṣṭaud grā́vṇaḥ /
yád viśvasṛ́ja ā́sata //
ápacitiḥ potrī́yām ayajat /
neṣṭrī́yām ayajat tvíṣiḥ /
ā́gnīddhrād vidúṣī satyám /
śraddhā́ ha_evā́yajat svayám //
írā pátnī viśvasṛ́jām /
ā́kūtir apinaḍḍhavíḥ /

3.12.9.6

idhmám̐ ha kṣúc ca_ebhya ugré /
tṛṣṇā́ ca_ā́vahatāmubhé //
vā́g eṣām̐ subrahmaṇyā́_āsīt /
chandoyogā́n vijānatī́ /
kalpatantrā́ṇi tanvānā́_ahaḥsam̐sthā́ś ca sarvaśáḥ
sam̐sthā́ś ca //
ahorātré paśupālyáu /
muhūrtā́ḥ preṣyā̀ abhavan /
mṛtyús tád abhavad dhātā́ /
śamitā́_ugró viśā́ṃ pátiḥ //

3.12.9.7

viśvasṛ́jaḥ prathamā́ḥ sattrám āsata /
sahásrasamaṃ prásutena yántaḥ /
táto ha jajñe bhúvanasya gopā́ḥ /
hiraṇmáyaḥ śakúnir bráhma nā́ma //
yéna sū́ryas tápati téjasā_iddháḥ /
pitā́ puttréṇa ptṛmā́n yóniyonau /
nā́vedavin manute táṃ bṛhántam /
sarvānubhum ātmā́nam̐ saṃparāyé //
eṣá nityó mahimā́ brāhmaṇásya /
ná kármaṇā vardhate nó kánīyān /

3.12.9.8

tásya_evá_ātmā́ padavít táṃ viditvā́ /
ná kármaṇā lipyate pā́pakena //
páñca paścāśátas trivṛ́taḥ saṃvatsarā́ḥ /
pañca pañcāśátaḥ pañcadaśā́ḥ /
páñca pañcāśátaḥ saptadaśā́ḥ /
páñca pañcāśata ekavim̐śā́ḥ /
viśvasṛ́jām̐ sahásrasaṃvatsaram //
eténa vái viśvasṛ́ja idáṃ víśvam asṛjanta /
yád víśvam ásṛjanta /
tásmād viśvasṛ́jaḥ //
víśvam enān ánu prájāyate /
bráhmaṇaḥ sā́yujyam̐ salokátāṃ yanti /
etā́sām evá devátānām̐ sā́yujyam /
sārṣṭítām̐ samānalokátāṃ yanti /
yá etád upayánti /
yé ca_enat prā́huḥ /
yébhyaś ca_enat prā́huḥ //

Commentaries (4)

Linked texts (18)