Taittiriyabrahmana 3.2.1
Taittirīyabrāhmaṇa 3.2.1
- Language
- Sanskrit
3.2.1.1
tṛtī́yasyām itó diví sóma āsīt /
táṃ gāyatry ā́harat /
tásya parṇám acchidyata /
tát parṇò 'bhavat /
tát parṇásya parṇatvám /
bráhma vái parṇáḥ /
yát parṇaśākháyā vatsā́n apākaróti /
bráhmaṇā_eváinān apā́karoti /
gāyatró vái parṇáḥ /
gāyatrā́ḥ paśávaḥ //
3.2.1.2
tásmāt trī́ṇi_trīṇi parṇásya palāśā́ni /
tripádā gāyatrī́ /
yát parṇaśakháyā gā́ḥ prārpáyati /
sváyā_eváinā devátayā prā́rpayati /
yáṃ kāmáyeta_apaśúḥ syād íti /
aparṇā́ṃ tásmai śúṣkāgrām ā́haret /
apaśúr evá bhavati /
yáṃ kāmáyeta paśumā́nt syād íti /
bahuparṇā́ṃ tásmai bahuśākhā́m ā́haret /
paśumántam eváinaṃ karoti //
3.2.1.3
yát prā́cīm āháret /
devalokám abhíjayet /
yád údīcīṃ manuṣyalokám /
prā́cīm údīcīm āharati /
ubháyor lokáyor abhíjityai /
iṣé tvā_ūrjé tvā_íty āha /
íṣam evá_ū́rjaṃ yájamāne dadhāti /
vāyávaḥ stha_íty āha /
vāyúr vā́ antárikṣasya_ádhyakṣāḥ /
antarikṣadevatyā̀ḥ khalu vái paśávaḥ //
3.2.1.4
vāyáva eváinān páridadāti /
prá vā́ enān etád ā́karoti /
yád ā́ha /
vāyávaḥ stha_ity upāyávaḥ stha_íty āha /
yájamānāya_evá paśū́n úpahvayate /
devó vaḥ savitā́ prā́rpáyatv íty āha prásūtyai /
śréṣṭhatamāya kármaṇa íty āha /
yajñó hí śréṣṭhatamaṃ kárma /
tásmād evám āha /
ā́pyāyadhvam aghniyā devabhāgám íty āha //
3.2.1.5
vatsébhyaś ca vā́ etā́ḥ purā́ mauṣyèbhyaś ca_ā́pyāyanta /
devébhya eváinā índrāya_ā́pyāyati /
ū́rjasvatīḥ páyasvatīr íty āha /
ū́rjam̐ hí páyaḥ saṃbháranti /
prajā́vatīr anamīvā́ ayakṣmā́ íty āha prájātyai /
mā́ vaḥ stená īśata mā́_agháśam̐sa íty āha gúptyai /
rudrásya hetíḥ pári vó vṛṇaktv íty āha /
rudrā́d eváinās trāyate /
dhruvā́ asmín gópatau syāta bahvī́r íty āha /
dhruvā́ evā́smin bahvī́ḥ karoti //
3.2.1.6
yájamānasya paśū́n pāhi_íty āha /
paśunā́ṃ gopīthā́ya /
tásmāt sāyáṃ paśáva úpa samā́vartante /
ánadhaḥ sādayati /
gárbhāṇāṃ dhṛ́tyā áprapādāya /
tásmād gárbhāḥ prajā́nām áprapādukāḥ /
upári_iva nídadhāti /
upári_iva hí suvargó lokáḥ /
suvargásya lokásya sámaṣṭyai //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (2)
- A Vedic Concordance — Maurice Bloomfield, English
- Die Kosmographie der Inder nach den Quellen dargestellt — Willibald Kirfel, German