Taittiriyabrahmana 3.2.10
Taittirīyabrāhmaṇa 3.2.10
- Language
- Sanskrit
3.2.10.1
vájro vái sphyáḥ /
yád anváñcaṃ dhāráyet /
vájre 'dhvaryúḥ kṣaṇvīta /
purástāt tiryáñcaṃ dhārayati /
várjo vái sphyáḥ /
vájreṇaivá yajñásya dakṣiṇató rákṣām̐sy ápahanti /
agníbhyāṃ prā́caś ca pratī́caś ca /
sphyéna_údīcaś ca_adhrā́caś ca /
sphyéna vā́ eṣá vájreṇāsyái pāpmā́naṃ bhrā́tṛvyam apahátya /
utkaré 'dhi právṛścati //
3.2.10.2
yáthā_upadhā́ya vṛścánty evám /
hástāv ávanenikte /
ātmā́nam evá pavayate /
sphyáṃ prákṣālayati medhyatvā́ya /
átho pāpmána evá bhrā́tṛvyasya nyaṅgáṃ chinatti /
idhmā́barhír úpasādayati yúktyai /
yajñásya mithunatvā́ya /
átho purorúcam eváitā́ṃ dadhāti /
úttarasya kármaṇó 'nukhyātyai /
ná purástāt pratyág úpasādayet //
3.2.10.3
yát purástāt pratyág upasādáyet /
anyátra_āhutipathā́d idhmáṃ prátipādayet /
prajā́ vái barhíḥ /
áparādhnuyād barhíṣā prajā́nāṃ prajánanam /
paścā́t prā́g úpasādayati /
āhutipathéna_idhmáṃ prátipādayati /
saṃpraty èvá barhíṣā prajā́nāṃ prajánanam úpaiti /
dákṣiṇam idhmám /
úttaraṃ barhíḥ /
ātmā́ vā́ idhmáḥ /
prajā́ barhíḥ /
prajā́ hy ātmana úttaratarā tīrthé /
táto médham upanī́ya /
yathādevatám eváinat prátiṣṭhāpayati /
prátitiṣṭhati prajáyā paśúbhir yájamānaḥ //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
- Yajurbrahmaṇabhāṣya — Sāyaṇācārya, Sanskrit