Pramāṇa · Search · About · API

Taittiriyabrahmana 3.2.4

Taittirīyabrāhmaṇa 3.2.4

Language
Sanskrit

3.2.4.1

kármaṇe vāṃ devébhyaś śakeyam íty āha śáktyai /
yajñásya vái sáṃtatim ánu prajā́ḥ paśávo yájamānasya sáṃtāyante /
yajñásya vícchittim ánu prajā́ḥ paśávo yájamānasya vícchidyante /
yajñásya sáṃtatir asi yajñásya tvā sáṃtatyai stṛṇāmi sáṃtatyai tvā yajñásya_íty ā́_ā́havanīyāt sáṃtanoti /
yájamānasya prajā́yai paśūnā́m̐ sáṃtatyai /
apáḥ práṇayati /
śraddhā́ vā́ ā́paḥ śraddhā́m evá_ārábya praṇī́ya prácarati /
apáḥ práṇayati /
yajñó vā́ ā́paḥ //

3.2.4.2

yajñam evá_ārábhya praṇī́ya prácarati /
apáḥ práṇayati /
vájro vā́ ā́paḥ /
vájram evá bhrā́tṛvyebhyaḥ prahṛ́tya praṇī́ya prácarati /
apáḥ práṇayati /
ā́po vái rakṣoghnī́ḥ /
rákṣasām ápahatyai /
apáḥ práṇayati /
ā́po vái devā́nāṃ priyáṃ dhā́ma /
devā́nām evá priyáṃ dhā́ma praṇī́ya prácarati //

3.2.4.3

apáḥ práṇayati /
ā́po vái sárvā devátāḥ /
devátā evā́rábhya praṇī́ya prácarati /
véṣāya tvā_íty āha /
véṣāya hy ènad ādatté /
prátyuṣṭam̐ rákṣaḥ prátyuṣṭā árātaya íty āha /
rákṣasām ápahatyai /
dhū́r asī́ty āha /
eṣá vái dhúryo 'gníḥ /
táṃ yád ánupaspṛśyātīyā́t //

3.2.4.4

adhvaryúṃ ca yájamānaṃ ca prádahet /
upaspṛ́śyā́tyeti /
adhvaryóś ca yájamānasya cā́pradāhāya /
dhū́rva táṃ yo 'smā́n dhū́rvati táṃ dhūrva yáṃ vayáṃ dū́rvāma íty āha /
dváu vā́vá púruṣau /
yáṃ ca_evá dhū́rvati /
yás ca_enaṃ dhū́rvati /
tā́v ubháu śucā́_arpayati /
tváṃ devā́nām asi sásnitamaṃ pápritamaṃ júṣṭatamaṃ váhnitamaṃ devahū́tamam íty āha /
yathāyajúr evá_etát //

3.2.4.5

áhrutam asi havirdhā́nam íty āhá_anārtyai /
dṛ́m̐hasva mā́ hvār íty āha dhṛ́tyai /
mitrásya tvā cákṣuṣā prekṣa íty āha mitratvā́ya /
mā́ bhér mā́ sáṃvikthā mā́ tvā him̐siṣam íty āhā́him̐sāyai /
yád vái kíṃ ca vā́to ná_abhivā́ti /
tát sárvaṃ varuṇadevatyàm /
urú vā́tāya_íty āha /
ávāruṇam evá_enat karoti /
devásya tvā savitúḥ prasavá íty āha prásūtyai /
aśvínor bāhúbhyām íty āha //

3.2.4.6

aśvínau hí devā́nām adhvaryū́ ā́stām /
pūṣṇó hástābhyām íty āha /
yátyai /
agnáye júṣṭaṃ nírvapāmī́ty āha /
agnáya evá_enāñ júṣṭaṃ nírvapati /
trír yájuṣā /
tráya imé lokā́ḥ /
eṣā́ṃ lokā́nām ā́ptyai /
tūṣṇī́ṃ caturthám /
áparimitam evá_avarundhe /
sá evám evá_anupūrvám̐ havī́m̐ṣi nírvapati //

3.2.4.7

idáṃ devā́nām idám u naḥ saha_íty āha vyā́vṛttyai /
sphātyái tvā ná_árātyā íty āha gúptyai /
támasīva vā́ eṣò 'ntáś carati /
yáḥ parīṇáhi /
súvar abhí víkhyeṣaṃ vaiśvānaráṃ jyotir íty āha /
súvar evá_abhí vípaśyati vaiśvānaráṃ jyótiḥ /
dyā́vāpṛthivī́ havíṣi gṛhītá údavepetām /
dṛ́m̐hantāṃ dúryā dyā́vāpṛthivyór íty āha /
gṛhā́ṇāṃ dyā́vāpṛthivyór dhṛ́tyai /
urv àntárikṣam ánvihī́ty āha gátyai /
ádityās tvā_upásthe sādayāmī́ty āha /
iyáṃ vā́ áditiḥ /
asyā́ evá_enad upásthe sādayati /
ágne havyám̐ rakṣasva_íty āha gúptyai //

Commentaries (4)

Linked texts (2)