Pramāṇa · Search · About · API

Taittiriyabrahmana 3.2.5

Taittirīyabrāhmaṇa 3.2.5

Language
Sanskrit

3.2.5.1

índro vṛtrám ahann /
sò 'páḥ /
abhyàmriyata /
tā́sāṃ yán médhyaṃ yajñíyam̐ sádevam ā́sīt /
tád ápódakrāmat /
té darbhā́ abhavann /
yád darbháir apá utpunā́ti /
yā́ evá médhyā yajñíyāḥ sádevā ā́paḥ /
tā́bhir evá_enā útpunāti /
dvā́bhyām útpunāti //

3.2.5.2

dvipā́d yájamānaḥ prátiṣṭhityai /
devó vaḥ savitā́_utpunātv íty āha /
savitṛ́prasūta evá_enā útpunāti /
ácchidreṇa pavítreṇā_íty āha /
asáu vā́ adityó 'cchidraṃ pavítram /
téna_evá_enā útpunāti /
vásoḥ sū́ryasya raśmíbhir íty āha /
prāṇā́ vā́ ā́paḥ prāṇā́ vásavaḥ /
prāṇā́ raśmáyaḥ //

3.2.5.3

prāṇáir evá prāṇā́nt sáṃpṛṇakti /
sāvitriyā́_ṛcā́ /
savitṛ́prasūtaṃ me kármāsad íti /
savitṛ́prasūtam evá_asya kárma bhavati /
pacchó gāyatriyā́ triṣṣamṛddhatvā́ya /
ā́po devīr agrepuvo agreguva íty āha /
rūpám evá_āsām etán mahimā́naṃ vyā́caṣṭe /
ágra imáṃ yajñáṃ nayatā́gre yajñápatim íty āha /
ágre evá yajñáṃ nayanti /
ágre yajñápatim //

3.2.5.4

yuṣmā́n índro 'vṛṇīta vṛtratū́rye yūyám índram avṛṇīdhvaṃ vṛtratū́rya íty āha /
vṛtrám̐ ha haniṣyánn índra ā́po vavre /
ā́po ha_índraṃ vavrire /
saṃjñā́m evá_āsām etát sā́mānaṃ vyā́caṣṭe /
prókṣitāḥ stha_íty āha /
ténā́paḥ prókṣitāḥ /
agnáye vo júṣṭaṃ prókṣāmy agnī́ṣómābhyām íty āha /
yathādevatám evá_enān prókṣati /
tríḥ prókṣati /
tryā̀vṛd dhí yajñaḥ //

3.2.5.5

átho rákṣasām ápahatyai /
śúndhadhvaṃ dáivyāya kármaṇe devayajyā́yā íty āha /
devayajyā́yā evá_enāni śundhati /
tríḥ prókṣati /
tryā̀vṛd dhí yajñáḥ /
átho medhyatvā́ya /
ávadhūtam̐ rákṣó 'vadhūtā árātaya íty āha /
rákṣasām ápahatyai /
ádityās tvág asī́ty āha /
iyáṃ vā́ áditiḥ //

3.2.5.6

asyā́ evá_enat tvácaṃ karoti /
práti tvā pṛthivī́ vettv íty āha prátiṣṭhityai /
purástāt pratīcī́nagrīvam úttaraloma_úpastṛṇāti medhyatvā́ya /
tásmāt purástāt pratyáñcaḥ paśā́vo médham úpatiṣṭhante /
tásmāt prajā́ mṛgáṃ grā́hukāḥ /
yajñó devébhyo nílāyata /
kṛ́ṣṇo rūpáṃ kṛtvā́ /
yát kṛṣṇājiné havír adhyavahánti /
yajñā́d evá tád yajñáṃ práyuṅkte /
havíṣó 'skandāya //

3.2.5.7

adhiṣávaṇam asi vānaspatyám íty āha /
adhiṣávaṇam evá_enat karoti /
práti tvā_ā́dityās tvág vettv íty āha sayatvā́ya /
agnés tanū́r asī́ty āha /
agnér vā́ eṣā́ tanū́ḥ /
yád óṣadhayaḥ /
vācó visárjanam íty āha /
yadā́ hí prajā́ óṣadhīnām aśnánti /
átha vā́caṃ vísṛjante /
devávītaye tvā gṛhṇāmī́ty āha //

3.2.5.8

devátābhir evá_enat sámardhayati /
ádrir asi vānaspatyá íty āha /
grā́vāṇam evá_enat karoti /
sá idáṃ devébhyo havyám̐ suśámi śamiṣva_íty āha śā́ntyai /
háviṣkṛd éhī́ty āha /
yá evá devā́nām̐ haviṣkṛ́taḥ /
tā́n hvyati /
trír hvayati /
tríṣatyā hí devā́ḥ /
íṣam ā́vada_ū́rjam ā́vada_íty āha //

3.2.5.9

íṣam evá_ūrjaṃ yájamāne dadhāti /
dyumád vadata vayám̐ saṃghātáṃ jeṣma_íty āha bhrā́tṛvyābhibhūtyai /
mánoḥ śraddhā́devasya yájamānasya_asuraghnī́ vā́k /
yajñāyudhéṣu práviṣṭāsīt /
té 'surā yā́vanto yajñāyudhā́nām udvádatām upā́śṛṇvann /
té párābhavan /
tásmāt svā́nāṃ mádhye 'vasā́ya yajeta /
yā́vanto 'sya bhrā́tṛvyā yajñāyudhā́nām udvádatām upaśṛṇvánti /
té párābhavanti /
uccáiḥ samā́hantavā́ āha víjityai //

3.2.5.10

vṛṅktá eṣām indriyáṃ vīryàm /
śréṣṭha eṣāṃ bhavati /
varṣávṛddham asi práti tvā varṣávṛddhaṃ vettv íty āha /
varṣávṛddhā vā́ óṣadhayaḥ /
varṣávṛddhā iṣī́kāḥ sámṛddhyai /
yajñám̐ rákṣām̐sy ánu prā́viśan /
tā́ny asnā́ paśúbhyo nirávādayanta /
túṣair óṣadhībhyaḥ /
párāpūtam̐ rákṣaḥ párāpūtā árātaya íty āha /
rákṣasām ápahatyai //

3.2.5.11

rákṣasāṃ bhāgò 'sī́ty āha /
túṣair evá rákṣām̐si nirávadayate /
apá úpaspṛśati medhyatvā́ya /
vāyúr vo vívinaktv íty āha /
pavítraṃ vái vāyúḥ /
punā́ty evá_enān /
antárikṣād iva vā́ eté práskandanti /
yé śū́rpāt /
devó vaḥ savitā́ híraṇyapāṇiḥ prátigṛhṇātv íty āha prátiṣṭhityai /
havíṣó 'skandāya /
tríṣ phalī́kartavā́ āha /
tryā̀vṛd dhí yajñáḥ /
átho medhyatvā́ya //

Commentaries (4)

Linked texts (5)