Taittiriyabrahmana 3.2.7
Taittirīyabrāhmaṇa 3.2.7
- Language
- Sanskrit
3.2.7.1
dhṛ́ṣṭir asi bráhma yaccha_íty āha dhṛ́tyai /
ápāgne 'gním āmā́daṃ jahi níṣkravyā́dam̐ sedha_ā́ devayájaṃ vaha_íty āha /
yá evá_āmā́t kravyā́t /
tám apahátya /
médhye 'gnáu kapā́lam úpadadhāti /
nírdagdham̐ rákṣo nírdagdhā árātaya íty āha /
rákṣām̐sy evá nírdahati /
agnivátyúpadadhāti /
asmínn evá loke jyótir dhatte /
áṅgāram ádhivartayati //
3.2.7.2
antárikṣa evá jyótir dhatte /
ādityám evá_amúṣmin loké jyótir dhatte /
jyótiṣmanto 'smā imé lokā́ bhavanti /
yá eváṃ véda /
dhruvám asi pṛthivī́ṃ dṛm̐ha_íty āha /
pṛthivī́m evá_eténa dṛm̐hati /
dhartrám asy antárikṣaṃ dṛm̐ha_íty āha /
antárikṣam evá_eténa dṛm̐hati /
dharúṇam asi dívaṃ dṛm̐ha_íty āha /
dívam evá_eténa dṛm̐hati //
3.2.7.3
dhármāsi díśo dṛm̐ha_íty āha /
díśa evá_eténa dṛm̐hati /
imā́n evá_etáir lokā́n dṛm̐hati /
dṛ́m̐hante 'smā imé lokā́ḥ prajáyā paśúbhiḥ /
yá eváṃ véda /
trī́ṇy ágre kapā́lāny úpadadhāti /
tráya imé lokā́ḥ /
eṣā́ṃ lokā́nām ā́ptyai /
ekam ágre kapā́lam úpadadhāti /
ékaṃ vā́ ágre kapā́laṃ púruṣasya saṃbhávati //
3.2.7.4
átha dvé /
átha trī́ṇi /
átha catvā́ri /
átha_aṣṭáu /
tásmād aṣṭā́kapālaṃ púruṣasya śíraḥ /
yád eváṃ kapā́lāny upadádhāti /
yajñó vái prajā́patiḥ /
yajñám evá prajā́patim̐ sám̐skaroti /
ātmā́nam evá tát sám̐skaroti /
tám̐ sám̐skṛtam ātmā́nam //
3.2.7.5
amúṣmin_loké 'nu páraiti /
yád aṣṭā́v upadádhāti /
gāyatriyā́ tát sáṃmitam /
yán náva /
trivṛ́tā tát /
yád dáśa /
virā́jā tát /
yád ékādaśa /
triṣṭúbhā tát /
yád dvā́daśa //
3.2.7.6
jágatyā tát /
chándaḥsaṃmitāni sá upadádhat kapā́lāni /
imā́n lokā́n anupūrváṃ díśo vídhṛtyai dṛm̐hati /
átha_ā́yuḥ prāṇā́n prajā́ṃ paśū́n yájamāne dadhāti /
sajātā́n asmā abhíto bahulā́n karoti /
cítaḥ stha_íty āha /
yathāyajúr evá_etát /
bhṛ́gūṇām áṅgirasāṃ tápasā tapyadhvam íty āha /
devátānām evá_enāni tápasā tapati /
tā́ni tátaḥ sám̐sthite /
yā́ni gharmé kapā́lāny upacinvánti vedhása íti cátuṣpadayā_ṛcā́ vímuñcati /
cátuṣpādaḥ paśávaḥ /
paśúṣv evá_upáriṣṭāt prátitiṣṭhati //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (1)
- A Vedic Concordance — Maurice Bloomfield, English