Pramāṇa · Search · About · API

Taittiriyabrahmana 3.2.9

Taittirīyabrāhmaṇa 3.2.9

Language
Sanskrit

3.2.9.1

devásya tvā savitúḥ prasavá íti sphyám ā́datte prasūtyái /
aśvínor bāhúbhyām íty āha /
aśvínau hí devā́nām adhvaryū́ ā́stām /
pūṣṇó hástābhyām íty āha yátyai /
ā́dada índrasya bāhúr asi dákṣiṇa íty āha /
indriyám evá yájamāne dadhāti /
sahásrabhṛṣṭiḥ śatátejā íty āha /
rūpám evá_asya_etán mahimā́naṃ vyā́caṣṭe /
vāyúr asi tigmátejā íty āha /
téjo vái vāyúḥ //

3.2.9.2

téja evá_asmin dadhāti /
viṣā́d vái nā́ma_āsurá āsīt /
sò 'bibhet /
yajñéna mā devā́ abhíbhaviṣyantī́ti /
sá pṛthivī́m abhyàvamīt /
sā́_amedhyā́_abhavat /
átho yád índro vṛtrám áhan /
tásya lóhitaṃ pṛthivī́m ánu vyàdhāvat /
sā́_amedhyā́_abhavat /
pṛ́thivi devayajanī́ty āha //

3.2.9.3

médhyām evá_enāṃ devayájanīṃ karoti /
óṣadhyās te mū́laṃ mā́ him̐siṣam íty āha /
óṣadhīnām áhim̐sāyai /
vrajáṃ gaccha gosthā́nam íty āha /
chándām̐si vái vrajó gosthā́naḥ /
chándām̐sy evá_asmai vrajáṃ gosthā́naṃ karoti /
várṣatu te dyáur íty āha /
vṛ́ṣṭir vái dyáuḥ /
vṛ́ṣṭim evá_avarundhe /
badhāná deva savitaḥ paramásyāṃ parāvátī́ty āha //

3.2.9.4

dváu vā́vá púruṣau /
yáṃ caivá dvéṣṭi /
yáś ca_enaṃ dvéṣṭi /
tā́v ubháu badhnāti paramásyāṃ parāváti śaténa pā́śaiḥ /
yò 'smān dveṣṭi yáṃ ca vayáṃ dviṣmás tám áto mā́ maug íty āhā́nimruktyai /
arárur vái nā́ma_āsurá āsīt /
sá pṛthivyā́m úpamlupto 'śayat /
táṃ devā́ ápahato 'ráruḥ pṛthivyā́ íti pṛthivyā́ ápāghnann /
bhrā́tṛvyo vā́ aráruḥ /
ápahato 'ráruḥ pṛthivyā́ íti yad ā́ha //

3.2.9.5

bhrā́tṛvyam evá pṛthivyā́ ápahanti /
tè 'manyanta /
dívaṃ vā́ ayám itáḥ patiṣyatī́ti /
tám aráruste dívaṃ mā́ skān íti diváḥ páryabādhanta /
bhrā́tṛvyo vā́ aráruḥ /
arárus te dívaṃ mā́ skān íti yád āha /
bhrā́tṛvyam evá diváḥ páribādhate /
stambayajúr harati /
pṛthivyā́ evá bhrā́tṛvyam ápahanti /
dvitī́yam̐ harati //

3.2.9.6

antárikṣād evá_enam ápahanti /
tṛtī́yam̐ harati /
divá evá_enam ápahanti /
tūṣṇī́ṃ caturthám̐ harati /
áparimitād evá_enam ápahanti /
ásurāṇāṃ vā́ iyám ágra āsīt /
yā́vad ā́sīnaḥ parāpáśyati /
tā́vad devā́nām /
té devā́ abruvan /
ástv evá no 'syā́m ápī́ti //

3.2.9.7

kyàn no dāsyatha_íti /
yā́vat svayáṃ parigṛhṇītha_íti /
té vásavas tvā_íti dakṣiṇatáḥ páryagṛhṇann /
rudrā́s tvā_íti paścā́t /
ādityā́s tvā_íty uttaratáḥ /
tè 'gnínā prā́ñco 'jayann /
vásubhir dakṣiṇā́ /
rudráiḥ pratyáñcaḥ /
ādityáir údañcaḥ /
yásya_eváṃ vidúṣo védiṃ parigṛhṇánti //

3.2.9.8

bhávaty ātmánā /
párāsya bhrā́tṛvyo bhavati /
devásya savitúḥ savá íty āha prásūtyai /
kárma kṛṇvanti vedhása íty āha /
iṣitám̐ hí kárma kriyáte /
pṛthivyái médhyaṃ cāmédhyáṃ ca vyúdakrāmatām /
prācī́nam udīcī́naṃ médhyam /
pratīcī́naṃ dakṣiṇā́_amedhyám /
prā́cīm údīcīṃ pravaṇā́ṃ karoti /
médhyām evá_enāṃ devayájanīṃ karoti //

3.2.9.9

prā́ñcau vedyam̐sā́v únnayati /
āhavaníyasya párigṛhītyai /
pratícī śróṇī /
gā́rhapatyasya párigṛhītyai /
átho mithunatvā́ya /
úddhanti /
yád evā́syā amedhyám /
tád ápahanti /
úddhanti tásmād óṣadhayaḥ párābhavanti //

3.2.9.10

mū́laṃ chinatti /
bhrā́tṛvyasyaivá mū́laṃ chinatti /
mū́laṃ vā́ atitíṣṭhad rákṣām̐sy ánu_útpipate /
yád dhástena chindyā́t /
kunakhínīḥ prajā́ḥ syuḥ /
sphyéna chinatti /
vájro vái sphyáḥ /
vájreṇaivá yajñā́d rákṣām̐sy ápahanti /
pitṛdevatyā́_atikhātā /
íyatīṃ khanati //

3.2.9.11

prajā́patinā yajñamukhéna sáṃmitām /
védir devébhyo nílāyata /
tā́ṃ caturaṅgulé 'nvavindann /
tásmāc caturaṅguláṃ khéyā /
caturaṅguláṃ khanati /
caturaṅgulé hy óṣadhayaḥ pratitíṣṭhanti /
ā́ pratiṣṭhā́yai khanati /
yájamānam evá pratiṣṭhā́ṃ gamayati /
dakṣiṇató várṣīyasīṃ karoti /
devayájanasyaivá rūpám akaḥ //

3.2.9.12

púrīṣavatīṃ karoti /
prajā́ vái paśávaḥ púrīṣam /
prjáyā_eváinaṃ paśúbhiḥ púrīṣavantaṃ karoti /
úttaraṃ parigrāháṃ párigṛhṇāti /
etā́vatī vái pṛthivī́ /
yā́vatī védiḥ /
tásyā etā́vata evá bhrā́tṛvyaṃ nirbhájya /
ātmána úttaraṃ parigrāháṃ párigṛhṇāti /
ṛtám asy ṛtasádanam asy ṛtaśrī́r asī́ty āha /
yathāyajúr eváitát //

3.2.9.13

krūrám iva vā́ etát karoti /
yad védiṃ karóti /
dhā́ asi svadhā́ asī́ti yoyupyate śā́ntyai /
urvī́ cā́si vásvī cāsī́ty āha /
urvī́m eváināṃ vásvīṃ karoti /
purā́ krūrásya visṛ́po virapśinn íty āha medhyatvā́ya /
udādā́ya pṛthivī́ṃ jīrádānur yā́m áirayan candrámasi svadhā́bhir íty āha /
yád evā́syā amedhyám /
tád apahátya /
médhyāṃ devayájanīṃ kṛtvā́ //

3.2.9.14

yád adáś candrámasi médhyam /
tád asyā́m érayati /
tā́ṃ dhī́rāso anudṛ́śya yajanta íty āhā́nukhyātyai /
prókṣaṇīr ā́sādaya /
idhmā́barhír úpasādaya /
sruváṃ ca srúcaś ca sáṃmṛḍḍhi /
pátnīm̐ sáṃnahya /
ā́jyena_udéhī́ty āhānupūrvátāyai /
prókṣaṇīr ā́sādayati /
ā́po vái rakṣoghnī́ḥ //

3.2.9.15

rákṣasām ápahatyai /
sphyásya vártmant sādayati /
yajñásya sáṃtatyai /
uvā́ca hā́sito daivaláḥ /
etā́vatīr vā́ amúṣmin_loká ā́pa āsann /
yā́vatīḥ prókṣaṇīr íti /
tásmād bahvī́r āsā́dyāḥ /
sphyám udásyan /
yáṃ dviṣyāt táṃ dhyāyet /
śucā́_eváinam arpayati //

Commentaries (4)

Linked texts (11)