Taittiriyabrahmana 3.3.1
Taittirīyabrāhmaṇa 3.3.1
- Language
- Sanskrit
3.3.1.1
prátyuṣṭam̐ rákṣaḥ prátyuṣṭā árātaya íty āha /
rákṣasām ápahatyai /
agnér vas téjiṣṭhena téjasā níṣṭapāmī́ty āha medhyatvā́ya /
srúcaḥ sáṃmārṣṭi /
sruvám ágre /
púmām̐sam evá_abhyaḥ sám̐śyati mithunatvā́ya /
átha juhū́m /
átha_upabhṛ́tam /
átha dhruvā́m /
asáu vái juhū́ḥ //
3.3.1.2
antárikṣam upabhṛ́t /
pṛthivī́ dhruvā́ /
imé vái lokā́ḥ srúcaḥ /
vṛ́ṣṭiḥ saṃmā́rjanāni /
vṛ́ṣṭir vā́ imā́n_ lokā́n anupūrváṃ kalpayati /
té tátaḥ kḷptā́ḥ sámedhante /
sámedhante 'smā imé lokā́ḥ prajáyā paśúbhiḥ /
yá eváṃ véda /
yádi kāmáyeta várṣukaḥ parjányaḥ syād íti /
agratáḥ sáṃmṛjyāt //
3.3.1.3
vṛ́ṣṭim evá níyacchati /
arvācī́nāgrā hí vṛ́ṣṭiḥ /
yádi kāmáyetā́varṣukaḥ syād íti /
mūlatáḥ sáṃmṛjyāt /
vṛ́ṣṭim evá_udyacchati /
tád u vā́ āhuḥ /
agratá evá_upáriṣṭāt sáṃmṛjyāt /
mūlatò 'dhástāt /
tád anupūrváṃ kalpate /
várṣuko bhavatī́ti //
3.3.1.4
prā́cīm abhyākā́ram /
ágrair antaratáḥ /
evám iva hy ánnam adyáte /
átho ágrād vā́ óṣadhīnām ū́rjaṃ prajā́ úpajīvanti /
ūrjá evá_annā́dyasyā́varudhyai /
adhástāt pratī́cīm /
daṇḍám uttamatáḥ /
mū́lena mū́laṃ prátiṣṭhityai /
tásmād aratnáu prā́ñcy upáriṣṭāl lómāni /
pratyáñcy adhástāt //
3.3.1.5
srúg ghy èṣā́ /
prāṇó vái sruváḥ /
juhū́r dákṣiṇo hástaḥ /
upabhṛ́t savyáḥ /
ātmā́ dhruvā́ /
ánnam̐ saṃmā́rjanāni /
mukható vái prāṇò 'pānó bhūtvā́ /
ātmā́nam ánnaṃ pravíśya /
bāhyatás tanúvam̐ śubhayati /
tásmāt sruvám evá_ágre sáṃmārṣṭi /
mukható hí prāṇò 'pānó bhūtvā́ /
ātmā́nam ánnam āviśáti /
táu prāṇāpāṇáu /
ávyardhukaḥ prāṇāpānā́bhyāṃ bhavati /
yá eváṃ véda //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (1)
- A Vedic Concordance — Maurice Bloomfield, English