Taittiriyabrahmana 3.3.10
Taittirīyabrāhmaṇa 3.3.10
- Language
- Sanskrit
3.3.10.1
yó vā́ áyathādevataṃ yajñám upacárati /
ā́ devátābhyo vṛścyate /
pā́pīyān bhavati /
yó yathādevatám /
ná devátābhya ā́vṛścyate /
vásīyān bhavati /
vāruṇó vái pā́śaḥ /
imáṃ víṣyāmi váruṇasya pā́śam íty āha /
varuṇapāśā́d eváināṃ muñcati /
savitṛ́prasūto yathādevatám //
3.3.10.2
ná devátābhya ā́vṛścyate /
vásīyān bhavati /
dhātúś ca yónau sukṛtásya loká íty āha /
agnír vái dhātā́ /
púṇyaṃ kárma sukṛtásya lokáḥ /
agnír eváināṃ dhātā /
púṇye kármaṇi sukṛtásya loké dadhāti /
syonáṃ me sahá patyā́ karomī́ty āha /
ātmánaś ca yájamānasya cā́nātyai saṃtvā́ya /
sám āyuṣā saṃprajáyā_íty āha //
3.3.10.3
āśíṣam eváitā́m ā́śāste pūrṇapātré /
antatò 'nuṣṭúbhā /
cátuṣpad vā́ etác chándaḥ prátiṣṭhitaṃ pátniyai pūrṇapātré bhavati /
asmín_loké prátitiṣṭhānī́ti /
asmínn evá loké prátitiṣṭhati /
átho vā́g vā́ anuṣṭúk /
vā́ṅ mithunám /
ā́po rétaḥ prajánanam /
etásmād vái mithunā́d vidyótamānaḥ stanáyan varṣati /
rétaḥ siñcán //
3.3.10.4
prajā́ḥ prajanáyan /
yád vái yajñásya bráhmaṇā yujyáte /
bráhmaṇā vái tásya vimokáḥ /
adbhíḥ śā́ntiḥ /
vímuktaṃ vā́ etárhi yóktraṃ bráhmaṇā /
ādā́ya_enat pátnī sahá_apá úpagṛhṇīte śā́ntyai /
añjaláu pūrṇapātrám ā́nayati /
réta evá_asyāṃ prajā́ṃ dadhāti /
prajáyā hí manuṣyàḥ pūrṇáḥ /
múkhaṃ vímṛṣṭe /
avabhṛthásya_evá rūpáṃ kṛtvā́_uttiṣṭhati //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (3)
- A Vedic Concordance — Maurice Bloomfield, English
- Original Sanskrit Texts on the Origin and History of the People of India, their Religion and Institutions — John Muir, English
- Altindische Grammatik — Jacob Wackernagel & Albert Debrunner, German