Taittiriyabrahmana 3.3.11
Taittirīyabrāhmaṇa 3.3.11
- Language
- Sanskrit
3.3.11.1
pariveṣó vā́ eṣá vánaspátīnām /
yád upaveṣáḥ /
yá eváṃ véda /
vindáte pariveṣṭā́ram /
tám utkaré /
yáṃ devā́ manuṣyèṣu /
upaveṣám ádhārayan /
yé asmád ápacetasaḥ /
tā́n asmábhyam iha_ā́kuru /
úpaveṣa_úpaviḍḍhi naḥ //
3.3.11.2
prajā́ṃ púṣṭim átho dhánam /
dvipádo naś cátuṣpadaḥ /
dhruvā́n ánapagān kurv íti purástāt pratyáñcam úpagūhati /
tásmāt purástāt pratyáñcaḥ śūdrā́ ávasyanti /
sthavimatá úpagūhati /
áprativādina eváinān kurute /
dhṛ́ṣṭir vā́ upaveṣáḥ /
śucā́_ṛtó vájro bráhmaṇā sám̐śitaḥ /
yā́_upaveṣé śúk /
sā́múm ṛcchatu yáṃ dviṣma íti //
3.3.11.3
áthāsmai nāmagṛ́hya práharati /
nír amúṃ nuda ókasaḥ /
sapátno yáḥ pṛtanyáti /
nirbādhyèna havíṣā /
índra éṇaṃ párāśarīt /
ihí tisráḥ parāvátaḥ /
ihí páñca jánām̐ áti /
ihí tisró 'ti rocanā́, yā́vat /
sū́ryo ásad diví /
paramā́ṃ tvā parāvátam //
3.3.11.4
índro nayatu vṛtrahā́ /
yáto ná púnar ā́yasi /
śaśvatī́bhyaḥ sámābhya íti /
trivṛ́d vā́ eṣá vájro bráhmaṇā sám̐śitaḥ /
śucā́_eváinaṃ viddhvā́ /
ebhyó lokébhyo nirṇúdya /
vájreṇa bráhmaṇā stṛṇute /
hatò 'sā́v ávadhiṣmāmúm ity āha stṛ́tyai /
yáṃ dviṣyā́t táṃ dhyāyet /
śucā́_eváinam arpayati //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (4)
- Bhāradvājaśrautasūtra — Sanskrit
- A Vedic Concordance — Maurice Bloomfield, English
- Altindische Grammatik — Jacob Wackernagel & Albert Debrunner, German
- Śūdras in Ancient India: A Social History of the Lower Order down to circa A.D. 600 — R. S. Sharma, English