Pramāṇa · Search · About · API

Taittiriyabrahmana 3.3.2

Taittirīyabrāhmaṇa 3.3.2

Language
Sanskrit

3.3.2.1

diváḥ śílpam ávatatam /
pṛthivyā́ḥ kakúbhi śritám /
téna vayám̐ sahásravalśena /
sapátnaṃ nāśayāmasi svā́hā_íti sruksaṃmā́rjanāny agnáu práharati /
ā́po vái darbhā́ḥ /
rūpám evá_eṣām etán mahimā́naṃ vyā́caṣṭe /
anuṣṭúbhā_ṛcā́ /
ā́nuṣṭubhaḥ prajā́patiḥ /
prājāpatyó vedáḥ /
vedásyā́gram̐ sruksaṃmā́rjanāni //

3.3.2.2

svéna_evá_enāni chándasā /
sváyā devátayā sámardhayati /
átho ṛ́g vā́vá yóṣā /
darbhó vṛ́ṣā /
tán mithunám /
mithunám evá_asya tád yajñé karoti prajánanāya /
prájāyate prajáyā paśúbhir yájamānaḥ /
tā́ny éke vṛ́thā_evā́pāsyanti /
tát táthā ná kāryàm /
ā́rabdhasya yajñíyasya kármaṇaḥ sá vidoháḥ //

3.3.2.3

yády enāni paśávo 'bhitíṣṭheyuḥ /
ná tát paśúbhyaḥ kám /
adbhír mārjayitvā́_utkaré nyàsyet /
yád vái yajñíyasya kármaṇo 'nyátra_ā́hutībhyaḥ saṃtíṣṭhate /
utkaró vā́vá tásya pratiṣṭhā́ /
etā́m̐ hí tásmai pratiṣṭhā́ṃ devā́ḥ samábharan /
yád adbhír mārjáyati /
téna śāntám /
yád utkaré nyasyáti /
pratiṣṭhā́m evá_enāni tád gamayati //

3.3.2.4

prátitiṣṭhati prajáyā paśúbhir yájamānaḥ /
átho stambásya vā́ etád rūpám /
yát sruksaṃmā́rjanāni /
stambaśó vā́ óṣadhayaḥ /
tā́sāṃ jaratkakṣé paśávo ná ramante /
ápriyo hy èṣā́ṃ jaratkakṣáḥ /
yā́vadapriyo ha vái jaratkakṣáḥ paśūnā́m /
tā́vadapriyaḥ paśūnā́ṃ bhavati /
yásya_etā́ny anyátrāgnér dádhati /
navadā́vyāsu vā́ óṣadhīṣu paśávo ramante //

3.3.2.5

navadāvó hy èṣā́ṃ priyáḥ /
yā́vatpriyó ha vái navadāváḥ paśūnā́m /
tā́vatpriyaḥ paśūnā́ṃ bhavati /
yásya_etā́ny agnáu praháranti /
tásmād etā́ny agnā́v evá práharet /
yatarásmint saṃmṛjyā́t /
paśūnā́ṃ dhṛ́tyai /
yó bhūtā́nām ádhipatiḥ /
rudrás tanticaró vṛ́ṣā /
paśū́n asmā́kaṃ mā́ him̐sīḥ /
etád astu hutáṃ táva svā́hā_íty agnisaṃmā́rjanāny agnáu práharati /
eṣā́ vā́ etéṣāṃ yóniḥ /
eṣā́ pratiṣṭhā́ /
svā́m evá_enāni yónim /
svā́ṃ pratiṣṭhā́ṃ gamayati /
prátitiṣṭhati prajáyā paśúbhir yájamānaḥ //

Commentaries (4)

Linked texts (3)