Pramāṇa · Search · About · API

Taittiriyabrahmana 3.3.3

Taittirīyabrāhmaṇa 3.3.3

Language
Sanskrit

3.3.3.1

áyajño vā́ eṣáḥ /
yò 'patnī́kaḥ /
ná prajā́ḥ prájāyeran /
pátny ánvāste /
yajñám evá_akaḥ /
prajā́nāṃ prajánanāya /
yát tíṣṭhantī saṃnáhyeta /
priyáṃ jñātím̐ rundhyāt /
ā́sīnā sáṃnahyate /
ā́sīnā hy èṣā́ vīryàṃ karóti //

3.3.3.2

yát paścā́t prā́cy anvā́sīta /
anáyā samádaṃ dadhīta /
devā́nāṃ pátniyā samádaṃ dadhīta /
déśād dakṣiṇatá údīcy ánvāste /
ātmáno gopīthā́ya /
āśā́sānā saumanasám íty āha /
médhyām evá_enāṃ kévalīṃ kṛtvā́ /
āśíṣā sámardhayati /
agnér ánuvratā bhūtvā́ sáṃnahye sukṛtā́ya kám íty āha /
etád vái pátniyai vráta_úpanáyanam //

3.3.3.3

téna_eváināṃ vratám úpanayati /
tásmād āhuḥ /
yáś ca_eváṃ véda yáś caná /
yóktram evá yute /
yám anvā́ste /
tásyāmúṣmin_loké bhavatī́ti yóktreṇa /
yád yóktram /
sá yógaḥ /
yád ā́ste /
sá kṣémaḥ //

3.3.3.4

yogakṣemásya kŀ̥ptyai /
yuktáṃ kriyātā āśī́ḥ kā́me yujyātā íti /
āśíṣaḥ sámṛddhyai /
granthíṃ grathnāti /
āśíṣa evá_asyāṃ párigṛhṇāti /
púmān vái granthíḥ /
strī́ pátnī /
tán mithunám /
mithunám evá_asya tád yajñé karoti prajánanāya /
prájāyate prajáyā paśúbhir yájamānaḥ //

3.3.3.5

átho ardhó vā́ eṣá ātmánaḥ /
yát pátnī /
yajñásya dhṛ́tyā áśithilaṃbhāvāya /
suprajásas tvā vayám̐ supátnīr úpasedima_íty āha /
yajñám evá tán mithunī́ karoti /
ūné 'tiriktaṃ dhīyātā íti prájātyai /
mahīnā́ṃ páyo 'sy óṣadhīnām̐ rása íty āha /
rūpám evā́syaitán mahimā́naṃ vyā́caṣṭe /
tásya té 'kṣīyamāṇasya nírvapāmi devayajyā́yā íty āha /
āśíṣam eváitā́m ā́śāste //

Commentaries (4)

Linked texts (4)