Taittiriyabrahmana 3.3.4
Taittirīyabrāhmaṇa 3.3.4
- Language
- Sanskrit
3.3.4.1
ghṛtáṃ ca vái mádhu ca prajā́patir āsīt /
yáto mádhv ā́sīt /
tátaḥ prajā́ asṛjata /
tásmān mádhuṣi prajánanam ivāsti /
tásmān mádhuṣā ná prácaranti /
yātáyāma hí /
ā́jyena prácaranti /
yajñó vā́ ā́jyam /
yajñéna_evá yajñáṃ prácaranty áyātayāmatvāya /
pátny àvekṣate //
3.3.4.2
mithunatvā́ya prájātyai /
yád vái pátnī yajñásya karóti /
mithunáṃ tát /
átho pátniyā evá_eṣa yajñásyānvārambhó 'navacchittyai /
amedhyáṃ vā́ etát karoti /
yát pátny avékṣate /
gā́rhapatye 'dhiśrayati medhyatvā́ya /
āhavanī́yam abhyúddravati /
yajñásya sáṃtatyai /
téjo 'si téjó 'nu préhī́ty āha //
3.3.4.3
téjo vā́ agníḥ /
téja ā́jyam /
téjasā_evá téjaḥ sámardhayati /
agnís te téjo mā́ vínaid íty āha_áhim̐sāyai /
sphyásya vártmant sādayati /
yajñásya sáṃtatyai /
agnér jihvā́_asi subhū́r devā́nām íty āha /
yathāyajúr evá_etát /
dhā́mne_dhāmne devébhyo yájuṣe_yajuṣe bhava_íty āha /
āśíṣam evá_etā́m ā́śāste //
3.3.4.4
tád vā́ átaḥ pavítrābhyām evá_utpunāti /
yájamāno vā́ ā́jyam /
prāṇāpānáu pavítre /
yájamāna evá prāṇāpānáu dadhāti /
punarāhā́ram /
evám iva hí prāṇāpānáu saṃcárataḥ /
śukrám asi jyótir asi téjo 'sī́ty āha /
rūpám evá_asyaitán mahimā́naṃ vyā́caṣṭe /
trír yájuṣā /
tráya imé lokā́ḥ //
3.3.4.5
eṣā́ṃ lokā́nām ā́ptyai /
tríḥ /
tryā̀vṛd dhí yajñáḥ /
átho medhyatvā́ya /
átha_ā́jyavatībhyām apáḥ /
rūpám evā́sām etád várṇaṃ dadhāti /
ápi vā́ utá_āhuḥ /
yáthā ha vái yóṣā suvárṇam̐ híraṇyaṃ peśaláṃ bíbhratī rūpā́ṇy ā́ste /
evám etā́ etárhī́ti /
ā́po vái sárvā devátāḥ //
3.3.4.6
eṣā́ hí víśveṣāṃ devā́nāṃ tanū́ḥ /
yád ā́jyam /
tátra_ubháyor mīmām̐sā́ /
jāmíḥ syā́t /
yád yájuṣā_ā́jyaṃ yájuṣā_apá utpunīyā́t /
chándasā_apá útpunāty ájāmitvāya /
átho mithunatvā́ya /
sāvitriyā́_ṛcā́ /
savitṛ́prasūtaṃ me kármāsad íti /
savitṛ́prasūtam evā́sya kárma bhavati /
pacchó gāyatriyā́ triḥṣamṛddhatvā́ya /
adbhír evá_oṣadhīḥ sáṃnayati /
óṣadhībhiḥ paśū́n /
paśúbhir yájamānam /
śukráṃ tvā śukrā́yāṃ jyótis tvā jyótiṣy arcís tvā_arcíṣīty āha sarvatvā́ya /
páryānptyā ánantarāyāya //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (4)
- Bhāradvājaśrautasūtra — Sanskrit
- A Vedic Concordance — Maurice Bloomfield, English
- Kapiṣṭhalasaṃhitā — Sanskrit
- Kapiṣṭhalakaṭhasaṃhitā — Sanskrit